Waimaw, Lamyang mare kaw nna Slg.Shwe Min Pyithutsit hpyen hpung ni rim woi mat ai mung mare masha marai 3 hpe rai ndat ya shi ai lam chye lu ai.
Myen hpyendap n pu, Shwe Min Pyithutsit hpung ni October 13 ya shana hkying 11 daram aten hta rim woi mat ai Lamyang mare masha marai 3 hpe, KIA hte matut mahkai ai ngu n tsen n hten ai hte nta kata kaw na sa rim woi mat ai re nga, dai ginra na mung mare masha langai KNG de n dai zawn tsun dan ai re.
“Dai hku nta kaw na sa rim woi mat ai, hpa majaw rim ai re ma n chye ai, ya gaw gara kaw rim tawn ai mung n chye, gara kaw sa san yang mung n chye ai nga, nta masha ni gaw myit tsang ai le,” nga tsun dan ai re.
Dai rim woi mat ai mare masha marai 3 gaw, Jan Balam Hkawng Yang, Jan Wawhpaik Lum Naw, the Slg Lapa Dau Hkawng ni rai nna, ya ten du hkra nta masha ni hte n jahkrum shangun ai lam chye lu ai.
U Shwe Min Pyithutsit hpung ni gaw, lai wa sai September 27 ya shani hta mung Lamyang mare na ramma langai hpe rim woi mat nna, Myitkyina Myen hpyen dap daju de sa kau ai lam chye lu ai.
Ya ten dai ginra hta U Shwe Min Pyithutsit hpung ni kaw na, shani shana n lata mare kata sinat gap jahkrit hkawm ai lam ni galaw nga ai lam mare masha ni tsun dan ai re.
Dai Pyithutsit hpyen hpung ni gaw, Wuyan mare hta shagyit jahkrat nna, lai sa lai wa mung mare masha ni hpe ladu lai san jep ai lam ni galaw nga ai re lam chye lu ai.
