Myitkyina Manmaw lam nmaw makau, Dingga mare hpe Myen hpyen dap ni October 15 ya jahpawt hkying 8 chyen daram hta, wan nat jahten kau ya ai lam chye lu ai.
Myen hpyen hpung ni gaw, October 15 ya laban jahpawt Dawhpum Yang mare kaw na lai lung wa ai Myen hpung ni rai nna, Dingga mare du ai hte mung mare masha nta nat jahten ai re lam, Dawhpum Yang ginra masha langai KNG shiga dap de tsun dan ai re.
“Lungjung Yang mare hpe wan nat ai hpyen hpung ni sha, Dingga mare hpe bai shang nat ai. gade daram gara hku hkru hten mat ai ngu gaw gadai mung n chye lu ai, ya tsan tsan kaw na yu yang gaw, Nawku Jawng hte hpaji jawng ni du hkra nat jahten da ya ma ai,” nga tsun dan ai re.
Dingga mare hta Myen hpyen dap ni matut dap jung shara jahkrat nga ai majaw, mung mare masha ni kadai mung mare kata de n mai wa yu nna kade daram gara hku nat jahten kau ai ngu hpe a tsawm tup hkrak n chye lu shi ai lam, ginra masha ni matut tsun dan ai re.
Dingga mare hpe wan nat jahten ai Myen hpyen hpung ni gaw, lai wa sai October 12 ya shani Lung Jung Yang mare na dum nta 11 hpe nat jahten ai hpyen hpung ni sha re lam matut chye lu ai.
Dai Myen hpyen hpung ni gaw, October 12 ya shani Lung Jung Yang mare hpe wa nat jahten kau da ai hpang, Dawhpum Yang Hk.L.Y 142 dap de shang mat nna, October 14 ya shani shawng lam de bai htu shamu shamawt hkawm wa ai hpang, ya na zawn Dingga mare hpe bai wa nat jahten ai re lam matut tsun dan ai re.
Dingga mare hta n ta hting gaw 18 daram nga ai mare kasha rai nna, lai wa sai July shata kaw na majan laja lana bai gap gasat hkat wa ai majaw, dai mare kaw na hprawng yen mat ra ai rai nga ai.
Ya ten dai ginra hta Myen hpyen dap hte KIA dap lapran hpyen masa matut shaja hkat taw nga ding yang re lam chye lu ai.