Sagaing ginra Indaw ginwang hta, dap jau magam bungli galaw nga ai Ko Thein Zaw Oo hpe Myen hpyen dap ni gap sat kau ya ai lam chye lu ai.
Lai wa sai August 12 ya shani, Indaw wanleng lam makau hta rim hkrum mat ai, Ko Thein Zaw Oo hpe shata 2 jan na ai hpang, Myen hpyen dap sat kau nna, mawdaw lam kaba makau hta kabai da ai hpe mung mare masha ni sa mu ai re lam, dai ginra na PDF lit nga ai salang langai KNG shiga dap de tsun dan ai re.
“Nhtu hte mala la rai zing ri sat da ma ai, moi mang hpe gaw Kani mare masha langai gaw shi hkauna de sa ai nga yang sa mu ai, lam kaba makau kaw sha sat da ai. mu ai gaw praw 7 ya shani re, moi mang hpe gaw anhte mare masha ni hkrai nat makoi kau ai. dai zawn anhte mung galaw ra ai ni hpe galaw ngut ai hpang she shiga shapraw ai lam hpe galaw ga ai,” nga tsun dan ai re.
Ko Thein Zaw Oo hpe October praw 6 ya shani Indaw kaw na, Katha maga de htu shadut hkawm ai Myen hpyen dap Hk.M.Y 101 dap ni n htu hte zingri sat kau ai rai nna, shi a moi mang hpe Kani mare mawdaw lam makau hta sa kabai da ai hpe, mare masha ni a tsawm sha sa hta nna, wan nat lup makoi ai re lam ginra masha ni matut tsun dan ai re.
Ya sat hkrum ai Ko Thein Zaw Oo gaw, Kawlin ginra masha langai rai nna, Indaw, Bamauk, Katha hte Sagaing dingdung daw ginra ni hta dap jau magam lit hpe la da ai wa rai nna, bungli hte Indaw de jahkring gan sa ai ten, rim hkrum mat ai re lam chye lu ai.
Indaw ginra hta Myen hpyen dap, hpyen uphkang ginra masat da ai rai nna, dai ginra hta ladu lai san jep ai lam ni hte n tsen n hten ai ni hpe jahkring hkring rim ahkyak la ai lam ni galaw taw nga ai majaw, mung mare masha ni galoi mung myit tsang let hkawm sa ra taw nga ai lam chye lu ai.
