Dawhpum Yang kaw du nga ai Myen hpyen laknak hte malu masha htaw da ai mawdaw hpung ni bai shamu hkyen ai majaw, shawng lam de shim lam la na matu, htu shadut hkawm wa ai Myen hpyen hpung ni hte, KIA dap ni majan laja lana gap gasat hkat taw nga ai re lam chye lu ai.
October 14 ya jahpawt hkying 9 daram aten kaw na, Dawhpum Yang Hk.L.Y (142) dap na hpyen n-gun (90) daram lawm ai hpyen hpung ni gaw, Hka La hte Dingga maga de htu shadut lung wa ai hpe KIA dap maga hkap shingla gasat ai kaw na majan byin taw nga ai re lam, ginra masha langai KNG shiga dap de ndai zawn tsundan ai re.
“Majan gaw ya mung matut byn nga ai, Hka La hte Dingga mare lapran kaw re. Hka La, Dingga maga de shim lam la na matu lung wa ai ni hpe hkap gasat ai ga rai nga ai, gap dat, hkring dat, rai laknak kaba ni hte mung ding yang gap bun hkat taw nga ai.” nga tsun dan ai re.
Myen hpyen dap ni ndai laman Dawhpum Yang Myen hpyendap kaw tawn da ai Hpyen laknak machyu pala hte malu masha ni hpe Namsan hpyen man maga de htaw shalai la lu na matu kalang bai shakut taw nga ai re lam matut tsun dan ai re.
Ya na zawn Myen hpyen mawdaw hpung ni n lu lung wa na matu, KIA dap maga ding yang hkap shingla gasat taw nga ai mung rai nga ai.
Dawhpum Yang Myen hpyen dap Hk.L.Y (142) dap hta Myen hpyen malu masha htaw da ai mawdaw 30 jan nga taw ai rai nna, October 10 ya shani hta mung Manmaw de na lung wa ai Myen hpyen n-gun 100 daram hte Mawdaw 6 mung dai dap de bai shang mat wa ai lam chye lu ai.
Ya ten Namsan hpyen man maga de kalang bai htu shadut na matu Myen hpyen dap ni shakut taw nga ai re lam chye lu ai.
