Hpakant Mawsiza mare, Aung Thar Yar lawk hta gat dut nga ai la langai sinat gap sat hkrum ai lam, ginra masha ni kaw nna chye lu ai.
October praw 11 ya shana maga hkying 3 daram aten, Mawsiza mare, Aung Thar Yar lawk (2) na, lu sha seng langai hta dung nga ai ten, sinat hpai ai la lahkawng shang wa nna, wa gap sat kau da ai lam, myi chyaw mu ai mung mare masha ni KNG shiga dap de tsun dan ai re.
“Gap sat hkrum ai wa gaw, Mawsiza mayzabum ntsa gat dut ai rai nga ai, shi hpe sinat hpai nna shang wa ai la lahkawng sa gap sat kau da ai, baw kaw hkra na dai shara hta nan si mat ai,” nga tsun dan ai re.
Gap sat hkrum ai wa gaw, asak 39 ning daram re Mokok daidaw rai nna Hpakant hta 10 ning jan gat dut ai Slg Aung Myint Thein (sh) Ko Hpyetti ngu ai wa rai nna, shi gaw Mawsiza myezabum n tsa hta gat seng hpaw da ai wa re lam chye lu ai.
Hpakant ginra hta lai wa sai October praw 3 ya shani hta mung Namsi gayau dut ai asak 40 ning ram re ai Ko Than Min Htaik ngu ai wa mung gap sat hkrum wa ai re.
Ndai laman Hpakant hta masha gap sat hkrum ai mabyin jahkring hkring byin taw nga ai rai nna, ndai shata laman hta sha, gat dut masha marai 4 gap sat hkrum sai rai nga ai.