Hpakant lam, Senghpra lahta Hkumtsai Zup mare de htu shadut shang wa ai Myen hpyen dap ni kaw na, dai ginra na mung mare masha marai 2 hpe rim woi mat ai sha n ga, gumhpraw sen 200 jan hpe mung, la mat wa ya ai lam, ginra masha ni kaw na chye lu ai.
October 11 ya jahpawt jau hkying 4 daram Namya kaw na, Hkumtsai zup maga de htu shadut lung wa ai, Myen hpyen dap hte Pyithutsit pawng hpawm hpyen n gun marai 20 daram gaw, Senghpra, Hkum Tsai Zup mare de shang wa nna, mung shawa marai 2 hpe rim hkyen ai ten dai mung mare masha 2 hprawng lawt mat ai hpang, laga ngam ai marai lahkawng hpe bai rim woi mat ai lam ginra masha ni KNG shiga dap de tsun dan ai re.
“Namya Pyithutsit wuhpung ni woi awn nna, Hkumtsai Zup de lung wa ma ai, dai kaw marai 2 hpe shawng sinat hte jahkrit nna, rim hkyen ai dai lahkawng hprawng lawt mat ai, dai hpang nta de shang nna marai 2 hpe bai rim mat ai, dai rim ai hta gumhpraw sen 200 jan mung kashun la mat ai,” nga tsun dan ai re.
Dai rim hkrum ai salang yan gaw, Hkum Tsai Zup mare kaw na, Slg Latau Naw Ja hte Slg Seng Li Brang yan rai nna, Slg Latau Naw Ja lamu ga dut da ai gumhpraw sen 200 jan mung lawm mat ai lam chye lu ai.
Ya ten dai salang yan hpe Nam Ya mare Myen hpyen dap kawng hta rim da nna, Mare masha ni hku na sa shaw la ai lam nnga yang, gap sat kau na lam tsun jahkrit da ai lam nga ai hpe chye lu ai.
Ya ten, Hpakant lam mayan hta, Nam Ya Myen hpyen dap kawng hta du nga ai Myen hpyen hpung ningnan ni gaw, October 10 ya shani Hpakant kaw na yu wa ai hpyen hpung ni rai nna, ya ten dai hpyen hpung ni gaw, Pyithutsit hte pawng hpawm nna dai ginra hta hpyen shamu shamawt ai lam galaw nga ai hpe chye lu ai.
October 10 ya shani hta sha, Kyauk Htu mare na mung mare masha marai 5 hte Kapmaw mare na ginra masha marai 3 hpe, gabaw nnga ai sha, Namya Myen hpyen dap de shaga woi ai lam ni nga wa ai hpe chye lu ai.
Ya ten Namya Myen hpyen dap kawng hta mung shawa marai 10 daram hpe rim woi da sai lam chye lu ai.
