Shwegu Mali hka sinna hkran YayLay mare hpe Myen hpyen dap ni September 18 ya jahpawt shang wa nna, dum nta tsa kaba hpe nat jahten kau ya ai sha n ga, mung shawa n kau hpe mung rim woi mat ai lam chye lu ai.
“Nat hpang ai gaw, YayLay mare htum pa maga de na re ga rai nga ai, ya wan hkru ai gaw mare ka ang du taw sai, ya mung hkru taw nga ding yang re lawng malawng gaw wan kaw yawng lawm mat sai, ya gade daram hkru mat sai ngu hpe chyawm a tsawm tup hkrak n chye lu shi ai.” nga nna ginra masha langai tsun dan ai re.
Myen hpyen dap mare wan nat jahten kau ai majaw, dum n ta 500 daram wan hkru hten mat ai re lam chye lu ai.
Myen hpyen dap ni dai mare de a kajawng sha du shang wa ai majaw, mung mare masha ni hprawng na lam n mu mat ai majaw, rim hkrum wa ai re lam ndai zawn matut tsun dan ai re.
“ Mare masha ni gaw, zing ai ni zing, zing taw nga ai laman n lu hprawng na rim hkrum ai ni rim hkrum rai gade daram rim hkrum mat wa ai ngu hpe chyawm tup hkrak n chye lu shi ai, yawng kabrawng jawng taw ai.” nga matut tsun dan wa ai re.
Lai wa sai September praw hta Mandalay kaw na lung wa ai Myen hpyen hka sanghpaw li gaw, ya ten Shwegu mare kaba hta du nga sai rai nna, dai Myen hpyen hka sanghpaw li du ai majaw, mung mare masha nta hpe n dai zawn nat jahten ai re nga ginra masha ni tsun ai re.
Ya lung wa taw nga ai Myen hpyen hka sanghpaw li hta lawm ai Myen hpyen hpung ni gaw, September 17 ya jahpawt Katha Duk Gyi mare kaw wa hkring nna, mung shawa marai 8 hpe sat kau nna, n ta 34 hpe mung nat jahten kau da ya ai lam chye lu ai.
Dai hpang, Shwegu de bai du ai ten hta mung, mung shawa ni kanbau magam bungli galaw nga ai jakli 40 daram hpe wan nat jahten kau ya ai lam matut chye lu ai re.
Ndai lamam Mandalay kaw na lung wa ai Myen hpyen hka sanghpaw li hpe shim lam la ya nga ai Myen hpyen hpung ni hte ginra daju PDF dap ni shani shagu gap gasat hkat ai lam ni nga taw ai hpe chye lu ai re.
