Myitkyina Sumprabum lam kaba n tsa, Daru hka Myen hpyen dap post hpe KIA hte Hkakabu Mungshawa Hpyendap KPF ni pawng hpawm nna, dai hpawt manap hkying 10 daram aten sa lu htim gasat zing kau sai lam chye lu ai.
Myitkyina hte deng 77 tsan ai Daru Hka Myen hpyen dap post hpe, KIA hte KPF dap ni dai hpawt manap hkying 7 daram aten kaw na sa htim gap gasat ai hpang, hkying 10 daram aten tsep kawp lu gasat zing kau sai lam, shawng lam hpyen shi sawk ni shana wa ai kaw na chye lu ai.
“Daru hka Myen hpyen dap hpe dai hpawt hkying 7 daram kaw na sa htim gap gasat ai, hkying 10 ram hta lu zing sai, tai hpyen maga marai 10 jan si hkala ai, laknak machyu pala alaw alam lu zing madu la ai.” nga shawng lam magam gun langai tsun dan ai re.
Dai Myen hpyen dap post hpe sa htim gap gasat zing ai hta, Myen hpyen dap maga masha marai 10 jan si hkala hkrum wa nna, laknak machyu pala alaw alam lu zing madu la ai lam chye lu ai.
Majan byin taw nga ai ten, dai shara de Myen hpyen n bungli langai pyen gayin sa wa ai rai tim, lamu mung taw ai majaw, nlu gap na bai n htang gayin mat wa ai lam ginra masha ni matut tsun dan ai re.
Daru hka hta dung ai Myen hpyen dap ni gaw, Myitkyina Putao lam lai wa lai sa mawdaw ni kaw gumhpraw hta sha nga nna, mung mare masha ni hpe jahkrit shama ai lam ni mung galaw taw ai hpyen dap re lam chye lu ai.
