Manmaw mare kaba hta gaw gap da ngut sai Manau shadung hpaw poi lamang kaba hpe du na November shata hta galaw na matu hkyen lajang nga ai a n tsa, ginra masha ni n ra sharawng ai lam tsun ai re.
Myen mungdan shara shagu hta ya ten, majan laja lana gap gasat hkat taw nga ai ten, Manau poi lamang galaw na rai n htap htuk manu shi ai majaw, mung masa pyaw ai ten hta wu wu di di rai galaw na hpe she ra sharawng ai lam, Manmaw ginra masha langai KNG shiga dap de n dai zawn tsun ai re.
“Ndai ten mung masa grai n pyaw ai ten manau poi lamang hpe gara hku mung n lu hkap la ai rai nna, n dai manau poi lamang hpe ninghkap mat wa na.” nga tsun ai re.
Ndai Manau shadung hpe lai wa sai 2020 ning kaw nna, gaw gap hpang wa ai gaw, dai ning laman a tsawm sha ngut kre sai majaw, manau poi galaw na hpe hkyen wa ai re nga, Manmaw ginra na salang langai KNG de n dai zawn matut tsun dan ai re.
“Dai ning na March shata kaw zuphpawng galaw ai, dai ten gaw mung masa naw pyaw ai le, Waimaw hkan Lashi manau poi mung nau nga ma ai nga nna she, dingla ni mung nau ga le nga n htoi masat dat ai ga rai nga ai. ya mung masa bai shuk wa rai yang gaw anhte bai tsun ai, naw htawt ga ngu yang n hkraw mat sai gaw salang ni. dai htunghking kaw lawm ai dingla ni Myen hpyen dap hte ma jahkrup kau ma sai.” nga tsun ai re.
Ndai zawn mung masa kahtet kamawt rai taw nga ai ten, Manau poi hpe n nau n mai rai woi galaw wa ai gaw, Poi shabyin shatai hta lawm ai, Crony hpaga la ni a majaw re nga dai salang wa ndai zawn matut tsun ai re.
“Madung gaw Myen hpyen dap hte bungli rau jawm galaw sha ai Crony lauban hpaga la ni a majaw rai nga ai, shan hte gaw gara hpyen dap hte mung ni ai le, n dai ten Myen hpyen dap a myit ra hpe shabyin ya taw ai ga rai nga ai.” nga tsun ai re.
Manmaw mare kaba Awng Ta lawk hta, gaw gap shangut da sai, Manau Wang kapang, Naura Pa hte Manau shadung hpaw poi kaba hpe du wa na November 23 kaw na 25 du hkra galaw na lam, Manmaw Ginwang Jinghpaw Wunpawng Laili Laika hte Htunghking hpung kaw na n dau da ai re.
Dai manau hpaw poi rai n galaw shi yang November 21 hte 22 n htoi lahkawng ya Golf gayet shingjawng poi lamang kaba mung ng ana re hpe chye lu ai.
Ndai Manau poi lamang kaba hpe galaw la lu na matu, Myen hpyen dap kongsi salang Jan Doi Bu hte rau, Hkyet Hting Nan yan September 13 ya shani Manmaw kaw du nga ai ten hta, Htunghking hpung ni kaw na shatlit shat ka sa gun jaw ai lam chye lu ai.
Ndai manau poi galaw na lam hte seng na, Manmaw ginwang htunghking rung de KNG kaw na phone hte hkrum lu na shakut yu ai rai tim, Phone hta lang ai lam n nga ai re.
2023 ning July praw 3 ya shani kaw na Myen hpyen dap ni Namsan ginra de hpyen n gun kaba hte htu shadut htim gasat wa ai kaw na, dai ni ten du hkra shani shagu ngu na majan laja lana gap gasat hkat taw nga ai sha n ga, Myitkyina Manmaw lam kaba hpe mung pat da ai re.
