KIO Ginjaw ginra, Awng Ja mare Lailum Myen hpyen dap hpe Wunpawng Mungdan Shanglawt Hpyendap KIA, dai hpawt majan htim gasat zing kau sai lam chye lu ai.
Myitkyina Manmaw lam kaba n tsa, Awng Ja Myen hpyen dap hpe, KIA dap ni dai hpawt manap hkying 6 chyen daram kaw, sa htim gap gasat ai hpang, hkying 8:00 daram aten hta lu gap zing la kau sai lam, shawng lam magam gun langai KNG shiga dap de tsun dan ai re.
Myen hpyen dap hpe lu gap gasat zing kau ai hpang, hkying 9 daram aten n bungli 2 hte sa gap bun wa ai lam chye lu ai.
“Lailum Awng Ja army Myen hpyen dap hpe dai hpawt hkying 8 daram kaw lu gasat zing kau sai. Dai lu gasat zing kau ai hpang, n bungli 2 hte sa gap bun ai, shawng kalang sa ai nbungli li gaw lahkawng lang da bat sa gap kau da na, hpang kalang bai sa wa ai n bungli gaw bawm bai sa jahkrt bun kau da ai.” nga tsun dan ai re.
Ya ten dai shara hta lahkawng maga dap laknak kaba ni hte laja lana matut gap gasat hkat taw nga ai lam chye lu ai.
Dai ginra hta majan laja taw ai shata lahkawng jan na wa sai rai nna, Myen hpyen dap maga sum machyi lam ding yang law taw nga ai shara mung rai nga ai.
