Nawnglut Ginwang, Mai Nawng mare sinna maga ja maw ginra hta Myen hpyen dap hte KIA dap lapran gap gasat hkat wa ai lam chye lu ai.
September 12 ya shana maga, Namawn kaw nna lung wa ai Myen hpyen n gun 50 daram lawm ai Hk.L.Y 111 dap ni hpe Wunpawng Mungdan Shanglawt Hpyendap KIA Dung 26 ni September 13 ya jahpawt Mai Nawng mare shingdu kaw hkap shing la gasat ai hpang, lahkawng maga aten gadun gap gasat hkat wa ai nga dai ginra na mung shawa langai KNG de tsun dan ai re.
“Dai hpawt hkying 6 kaw na gap hkat hpang wa ma ai, majan byin ai gaw mare hte deng 2 daram sha tsan ai ja maw sa lam kaw rai nga ai, dai kaw KIA hte PDF ni galaw ma nga ai, Myen hpyen dap ni lung wa ai majaw, gap hkat wa ai ga rai nga ai.” nga tsun dan ai re.
Dai gap gasat hkat ai hta hkying hkum mi daram gap gasat hkat wa ai rai nna, lahkawng maga si hkala sum machyi lam hpe a tsawm tup hkrak n chye lu ai rai nna, Myen hpyen dap maga laknak kaba ni hte gap bun wa ai lam nga ai hpe chye lu ai.
Dai ginra hta hpyen masa shaja hkat taw nga ai majaw, Ja maw ginra ja htu ai lam hkring taw nga ai bat mi jan rai sai lam chye lu ai.
