Manmaw hte Shwegu lapran, Sinhkan mare hta dung ai Myen hpyen dap gap dat ai laknak kaba si, mare kata wa hkrat kapaw ai majaw, ginra masha ni myit tsang nga ai lam chye lu ai.
September 13 ya jahpawt hkying 9 daram aten, Sinhkan mare Mali hka mahkrai baw hta dung ai Myen hpyen dap gaw, Mali hka sinpraw-sinna lahkawng maga de laknak kaba 5 lang gap shadam bun ai hta, mare kata hta mung wa hkrat ai majaw, mung shawa ni hkrit kajawng ai lam, dai ginra na mung shawa langai KNG shiga dap hpe tsun dan ai re.
“Mali hka htaw ra hkran n dan hkran gap bun wa ai, langai gaw mare shinggan kaw wa hkrat ai, langai gaw mali hka ka ang kaw hkrat ai, langai gaw anhte mare grup yin kaw wa hkrat ai, mare makau wa hkrat ai majaw, mung mare masha ni kajawng chyawng ai.” nga tsun dan ai re.
Mare kata wa hkrat ai raitim, mung masha hkala hkrum ai lam gaw n nga ai nga, matut tsun dan ai re.
Myen hpyendap ni ya na zawn laknak kaba gap shadam bun ai lam gaw, Mandalay kaw nna bai lung wa taw nga ai hka sanghpaw li hpe shim lam la ya ai hku nna tau hkrau gap shadam bun wa ai re nga, ginra masha ni tsun maram da ai re.
Mandalay kaw nna September praw 9 ya shani lung wa ai Myen hpyen hka sanghpaw li 6 gaw, ya ten Hti Chyaik mare hta du nga sai lam chye lu ai.
Myen hpyen hka sanghpaw li lung wa shagu, mare kata laknak kaba gap bun ai lam hte, mung mare masha ni hpe hpyen ninggang shatai rim woi ai lam jahkring hkring galaw nga ai re.
