Muse-Namhkam lapran, Jelan mare hta Myen hpyendap hte Balawng TNLA dap lapran majan a majaw, mung mare masha ni hprawng yen ra nga ai sha n ga, laknak kaba si hkra ai majaw si, hkala hkrum ai lam ni byin nga ai re.
August 28 ya shani, Muse- Namhkam lapran Jelan mare mayan Myen hpyendap hte TNLA lapran majan laja lana gap gasat hkat wa ai hta, Myen hpyen dap maga laknak kaba gap sharu bun ai sha n ga, nbungli hte mung laja lana wa gap bun ai majaw, Jelan makau Nampati mare na mung mare masha ni Namjan buga nawku hpung wang hta sa du hprawng yen nga ai lam, hpyen yen mung shawa langai KNG shiga dap de n dai zawn tsun dan ai re.
“Mare hte ni ai Jelan Nampati kaw na buga ginjaw Namjan nawku hpung wang hta sa du yen nga ga ai. anhte yen kau da ai mare de ya mung matut ngoi nga ding yang, gap hkat nga ding yang re lo,” nga tsun dan ai re.
Ya ten Namjan nawku hpung wang hte Jelan mare makau grup yin na mung mare masha 200 jan sa du hprawng yen nga ai re lam chye lu ai.
Majan byin ai Jelan mare makau grup yin hkan na, Sam, Balawng, Miwa, Jinghpaw yawng rai yang, hpyen yen mung shawa hkying mi jan ai rai nna, laga amyu baw sang ni tinang man ang ai shara de hprawng yen ai rai nna, Namjang Nawku jawng wang hta hprawn yen ai ni gaw, Jinghpaw Wunpawng ni hkrai re lam chye lu ai.
Ya ten hpyen yen mung shawa ni a matu, tsi mawan hte malu masha garum ningtum lam ni ra ahkyak nga ai lam chye lu ai.
Namhpakka hta dung ai Myen hpyen dap kaw na laknak kaba gap shadam bun ai majaw, mung mare masha ni si hkala ai lam ni jahkring hkring hkrum nga re.
