Mungmyit Sinli, Namhpakka mare hta Myen hpyen dap gap dat ai laknak kaba si a majaw, mung shawa marai 1 si nna, marai 2 hkala hkrum wa ai lam chye lu ai.
September praw (1) jahpawt, hkying 8 aten daram kaw nna, Namhpakka Myen hpyen dap Hk.L.Y (123 ) dap kaw nna laknak kaba gap bun ai rai nna, hkying 2 daram aten, mare kata hta nan wa hkrat hkra ai majaw, mung shawa langai si nna, marai 2 hkala sawng wa ai re nga, dai ginra na mung shawa langai KNG hpe n dai zawn tsun dan ai re.
“Dai ni bai Namhpakka mare hta masa n htuk nga ai, Myen hpyen dap ni laknak kaba hkrup mara bai gap shadam bun ai majaw, mung mare masha ni bai si hkala hkrum sai. Si hkala hkrum ai jinghpaw re. Madu wa si nna, madu jan hte laga salang langai hkala sawng ai.” nga tsun dan wa ai re.
Myen hpen dap ni gap dat ai laknak kaba si gaw, Namhpakka mare Zi dabang lawk na, Npawt Pau La yan nu wa ni a n ta hta wa hkrat ai majaw, n ta madu Slg Npawt Pau La dai shara hta kalang ta si nna, madu jan Waje Hkawn Nan hte Slg Zinghtung La Doi yan hkala sawng wa ai re lam matut chye lu ai.
Myen hpyen dap ni dai hpawt manap hkying 11 daram aten, KIA Dung 9 Baknoi bum maga de, Jet nbungli langai hte wa gap bun nna, lahkawng maga majan gap gasat wa ai lam nga ai re hpe chye lu ai.
KIA Dung 9 maga de majan byin ai rai tim, Namhpakka mare makau grup yin hta laga sinat ngoi ai lam n nga ai rai tim, Myen hpyen dap maga ya na zawn gap shadam bun wa ai rai nga ai.
August 30 ya shani hta mung, Namhpakka Myen hpyen dap kaw na laknak kaba gap shadam bun ai majaw, asak 15 ning re num kasha langai asak si sum nna, marai 2 hkala hkrum ai mabyin lam mung nga wa sai re.
Ndai laman Namhpakka, Nam Um, Je Lan, Nam Hkam mare makau grup yin ni hta, Myen hpyen dap hte Balawng TNLA dap ni ding yang majan gap gasat nga ai re.
