Manmaw – Loi Je lam kaba hku nna gun rai htaw shalai ai lam hpe Myen hpyen dap bai pat kau sai lam chye lu ai.
August praw 6 ya shani kaw nna, Manmaw-Loi Je lam kaba gun rai htaw gin len ai lam hpe tara shang hkum pat nna, hkrun lam hkawm mung shawa ni hpe mung laja lana san jep ai hta mung chying masat n lawm yang n mai hkawm sa ai lam, dai ginra na mung shawa ni tsun dan ai re.
“hkrun lam hkawm ai hta madung mung chying masat jep ma ai. Manmaw hte Loi Je lapran shara 4 hta jep ai. Mawdaw ni hpe gaw laisin jep ai nga tsun ai. lu sha ma n htaw shalai shangun ai.” nga nna August praw 8 ya shani Loi Je kaw nna Manmaw de yu wa ai mung shawa langai tsun dan ai re.
August praw 6 ya shani hta mung, Zinlum Myen hpyen shagyit hta, gunrai htaw without mawdaw 6 hpe rim kau ya ai lam chye lu ai.
Ya ten dai lam kaba hta, tara shang laisin lu ai mawdaw ni hpe sha pru hkawm shangun nna, Myen hpyen dap maga n dai zawn pru shang lam laja lana san jep wa ai gaw, KIO Uphkang ginra yawng de malu masha hpe ndai lam hku na htaw ginlen bang la taw nga ai ngu mara hte hkum pat ai lam rai na re nga, ginra masha ni tsun maram tawn ai re.
Manmaw hte Loi Je lapran Myen hpyen dap shagyit 4 nga ai rai nna, Loi Je pru wa ai shara hte ကျောက်စခန်း dai shara lahkawng hta jep dik re lam chye lu ai.
Myen hpyen dap maga ya na zawn Loi Je mare de gun rai htaw ginlen ai lam hpe hkum pat kau ai majaw, dai ginra na mung shawa ni malu masha yak hkak wa na hpe myit tsang taw nga ma ai re.
Manmaw Loi Je lapran lai wa sai ten, mawdaw shabrai mrai langai lap Mun 3 sha nga ai rai tim, ya ten lap Mun 7 du hkra manu tsaw rawt mat ai lam chye lu ai.
