Hpakant KIA Dapba (9) ginra, Sengtawng hte Gwihka mare lapran Kasen Bum hta dung ai Myen hpyen dap hte Sezin Myen hpyen dap dap shara lahkawng hpe, KIA dap ni htim gap gasat ai zing kau lu ai lam chye lu ai.
August praw 7 ya jahpawt jau, hkying 5 daram aten, Kasen Bum hpe sa htim gap gasat nga ai ten Sezin hkrai noi pawt hta dung ai Myen hpyen dap hpe mung sa htim gap gasat zing la lu ai lam, KIA shiga magam dap lithkam Dukaba Nhpang Naw Bu KNG shiga dap hpe tsun ai re.
â Kasen Bum Myen hpyen dap langai hpe lu gap zing ai, dai hpang Sezin hkrai noi pawt hta nga ai dap shara hpe mung zing la lu ai da.â
Kasen Bum hpe sa htim gap gasat ai ten, Myen hpyen dap maga de na, Nammaw hte Hpakant Myen hpyen Byuha kawng kaw nna laknak kaba ni hte laja lana gap bun wa ai re lam chye lu ai.
Kasen Bum hta Myen hpyen n gun 50 daram dung ai rai nna, dai ginra hta bum yi galaw sha ai mung mare masha ni hpe laja lana san jep ai hte gumhpraw hta sha taw ai lam ni a majaw, sa htim gap gasat ai re lam, ginra masha langai KNG de tsun dan ai re.
âDai ginra mayan  kaw hpun htaw, wan n ga htaw, sau htaw re yawng kaw na gumhpraw hta sha na nga ai grai na sai, bum yi galaw ai mung mare masha ni hpe mung jahkrit shama san jep ai lam ni jahkring hkring galaw ai. Mung shawa hpe jam jau jaw ai na sai re majaw, mung shawa ni gaw dai hpe jau jau kaw na n nga shangun mayu ai grai na sai, â nga tsun dan ai re.
Sezin hkrai noi pawt hta dung ai dap ni gaw, Sam hkyeng SNA hte Myen hpyen dap ni re lam chye lu ai.
Dai hpawt August praw 7 ya jahpawt Kasen Bum de laja lana gap gasat hkat taw nga ai ten, Indawgyi maga lam hku na dai Hpakant lam de hpyen n gun garum n lu lung na matu sa htim gap gasat ai rai na re nga, ginra masha ni tsun maram da ai re.
Ya na zawn Myen hpyen dap shara lahkawng hpe sa htim gap gasat zing kau ai hta, Myen hpyen dap maga sum machyi lam law ai majaw, aten n tam n bung li hte sa htim gap gasat wa mai ai re majaw, ginra masha yawng sadi maja na nga na lam, Dukaba Nhpang Naw Bu tsun sadi jaw da ai re.
