Wunpawng Mungdan Shanglawt Hpyendap KIA Dapba 7 ginra daju, Hpare hte Zuplang mare lapran na ga sau htu company bungli dabang hta June 18 ya shani ga sharut gyi nna masha 2 si ai lam chye lu ai.
Gasharut gyi ai shara gaw dap dung 32 makau bungli dabang kaw rai nna, Miwa amyusha marai langai hte Rawang amyusha langia re lam chye lu ai re.
KIA Dap Ba 7 ginra Hpare Mare makau kaw nga ai Ga Sau htu shara ni hta, ya na zawn ga gyi na masha si ai lam jahkring hkring byin nga ai hpe Hpare hte Pangwa kaw nga ai ginra masha langai KNG shiga dap hpe tsun dan ai re.
Jahpwi sinpraw hkran, Hpare ginra hpe Wunpawng Mungdan Shanglawt Asuya ni kawn shara ka-up sa nna, Ga Sau htu nga ai rai nna, Sinpraw Dingdung Pangwa maga de gaw Myen hpyendap npu laknak lang wuhpung ni htu sha taw nga ai re.