Shiga

KIO hte PSLF Matut Ta Gindun Na Matu Myithkrum Lam Ndau

Wunpawng Mundan Shanglawt Asuya KIO hte Ta-ang Amyusha Rawt Malan Hpung, PSLF/ TNLA hkrum zup hpawng galaw ai lam gaw, galoi mung hkrum jahta taw ai hpe Covid a majaw n lu hkrum byin mat ai kaw nna, ya bai hkrum jahta ai lam sha re lam, rawt malan hpung lahkawng maga nsen langai hte tsun ai re.

Mungmyit Sinli ginra hta byin nga ai masa lam ni hta hkan nna, rawt malan hpung lahkawng maga hkrum zup jahta ai lam hpe lai wa sai May 16-17 lahkawng ya galaw wa ai rai nna, lawng lam 5 myit hkrum ai lam May 28 ya shani n dau laika shapraw tawn ai re.

N dai zawn, hkrum zup lam galaw nna, n dau laika shapraw ai masa lam the seng nna, PSLF/TNLA tsun shaga lit nga, Du kaba Tar ike Kyaw hpe KNG shiga dap matut mahkai san ai shaloi ya na zawn tsun ai re.

“Anhte gaw mi na tim, hpunau rawt malan hpung ni re. Moi kaw na mung masa magam bungli hta rau ta ginrun na galaw ai hpung ni ma re. Covid byin hpang ai kaw nna, anhte lahta daw ningbaw ni man hkrum, hkrum shaga ai lam n lu galaw mat ai. Ya gaw Covid ma dai ram n byin sai, loi ma shim sai majaw bai hkrum ai lam re. lawu tsang daw de gaw mi na mung, nhkum n ra manghkang ni gaw byin ai le. Dai chyawm grai tsun ra na lam n nga ai, dai majaw myit hkrum lam la da ai kaw mung dai lawng lam ni ka shalawm tawn ai.” nga nna, PSLF/TNLA a tsun shaga lit nga Dukaba Tar Aike Kyaw tsun ai re.

KIO shiga lit hkam Dukba Nawbu hku nna mung, myit hkrum bawng ban la lu sai lam hpe mahtai langai sha tsun wa ai re.

Ndau laika hta shalawm tawn ai myit hkrum lawng lam 5 ni gaw,1- KIO hte PSLO (mi shawng de) rawt malan wuhpung lahkawng lapran moi myit hkrum ga sadi tawn ai prat tup hpunau jinghku rawt malan hpung makyit sumri hpe PSLF hku nna, matut n di masat dingsat galaw, hkrang shapraw mat na lam, 2- gumshem ladat hkrat sum na matu rau ta gindun shakut mat nna, moi na zawn rau run let, tsawra magyip kap hkat nna, amyu sha shada mang hkang ni n byin hkra jawm makawp na lam, 3- tinang ginra kata nga ai myu sha yawng a, shimlam a matu lit la nna, myit hkyi lit li shangun ai magam bungli ni koi gam na matu, 4-ka-ni nanghpam pat jasan bungli hpe shada shiga jaw hkat let mung shawa the rau jawm shatsai galaw na, 5- ra ai lam ni hpe wuhpung lahkawng maga ra yang ra ai hku matut bawng ban jahkrup mat na re lam ka ndau da ai rai nga ai.

Ndai ten, ndau laika shapraw ai hte seng nna, Mungmyit Sinli ginra hta nga ai mung shawa langai, shi a ningmu hpe ya na zawn tsun tawn ai re.

“kadai mung kade a amyu sha lam yan hpe sha, madung dat galaw wa ai shaloi gaw, myu langai hte langai, magam dap langai hte langai lahpran kaw, n chye na hkat ai lam ni, masa n bung ai majaw bungli galaw yak hkak wa ai lam law law nga ai ka rai nga ai. Mungmyit Sinli Ga gaw, dai majaw nhkrum n mai atsang madang rai mat ai majaw, magam dap lahkawng hkrum ai rai ang ai ngu mu mada hkam sha lu ai law.” nga nna, Mungmyit Sinli, Zau Bung Namtau ginra masha langai KNG shiga dap hpe tsun ai.

Mungmyit Sinli ginra hta, laknak hpai rawt malan hpung law ai hte maren, ginra kata n byin ging ai manghkang ni grau law wa na ginra masha ni myit tsang nga ai re.

Dai sha n ga, ginra langai kaw sha, jawm kahtap nna, wuhpung langai hpang langai a hkawn kang hta ai mang hkang ni a majaw, mung shawa ni myit hkyi lit li hkrum nga ai lam tsun ai.

“Mung shawa ni gaw, uphkang ginra kahtap taw ai zawn re lam ni, bai hkawn hkangse hta ai lam hta wuhpung shagu ahkawn hta ai lam zawn re ni, ngut jang mung shawa hpe myit hkyi litli shangun ai zawn re bungli shayawm mat wa na the, lahkawng maga pri nem ai, rau nga rau pra, simsa ai hku nga lu na, dai lam ni gaw mung shawa ra sharawng ai lam ni re ga ai.” nga nna Mungmyit Sinli ginra masha matut tsun ai re.

KIO/KIA hte PSLF/ TNLA wuhpung lapran shawoi mung galaw ai raitim, ndai kalang hkrum zup hpawng gaw, mungshawa ni a mayak ni hpe hparan ya lu nna, akyu ara laklai wa na hpe mungshawa ni myit mada nga ma ai re.

Related Articles

Back to top button