Hugawng Pa kaw nna Yuzana Company pru mat wa sai raitim, Wunpawng Mungdan Shanglawt Hpung KIO gaw, 10 ning jan lamu ga tat sum kau ai ginra masha ni hpe lamu ga bai n jaw ai sha, kaga ni hpe mahtang lamu ga daw garan ya taw ai hpe n ra sharawng ai lam, lamu ga madu ni tsun ai re.
2022 shaning htum daw kaw nna, KIO/KIA bap ba 2 npu na lit nga ai salang ni gaw, buga lamu ga garan comitee hpaw shabawn da let, Danai, Lidu lam ntsa e nga ai Nawngmi hte Bangkok mare na shara ni hta mare ning nan gaw de ya na matu shara jahkrat nga sai re.
Yuzana lata de Lamu ga tat sum kau ai Nawngmi, Wara Zup, Jahtuzup, Ting Kawk, Pa Nep dai ginra na mung mare masha ni gaw, dai lamu ga ni hpe bai lu la hkra, ya ten lit nga ai KIO asuya hpe ding yang hpyi shawn taw nga ai re.
KIO asuya hku nna lamu ga garan ya ai lamang hta, buga masha ni hpe ning shawng n jaw ai sha, jasam masha ni hpe shawng garan ya na hpe n ra ai lam, Jahtuzup ginra masha langai tsun ai re.
“Ya shanhte shaga bang ai kaw gaw wunpawng ni mung lawm ai zawn laga mai gan masha ni ma lawm ai. Dai kaw gaw n kau mi gaw ja gumhpraw jaw di shang wa ai lam ni mung nga ai. Dai majaw shanglawt asuya mung n dai ni hpe a tsawm myit yu di galaw sha ngun mayu ai”
Shanglawt asuya gaw dai shara ni hta mare ning nan gawde jat na matu lai wa sai shaning kawn masing jahkrat taw ai rai n’na, Hpakant, Myitkyina, Sam mung ginra na lamu ga nlu ai ni hte hpyen yen mung shawa ni hpe daw garan ya taw ai re.
Bangkok mare hta gaw lai wa sai April praw kaw na nta hting gaw 35 daram matu lamu ga daw garan ya sai rai nna, Nawng Mi mare hta gaw lamu ga daw garan ya na matu beckhoe jak kaba ni hte shara ganaw jasan ya ai lam kaw nga taw sai re.
Lamu ga daw garan ya ai lam hta nta htinggaw langai mi Pe 100 hte Pe 80 grup yin dam ai hpe daw jaw ai rai n’na, mare ningnan gawde ya na shara 2 hkawng hta nta hting gaw tsalam gaw gap mai ai lam, ginra masha ni tsun maram taw ma ai re.
Dai lamu ga ni gaw lai wa sai 2006 ning hta mung mare masha ni galaw sha nga ai yi, sun hkau na ni hpe Yuzana Company zing ka up la kau ya lamu ga ni mung rai nga ai.
Myen hpyendap daru magam zing la kau ai 2021 ning April shata hta gaw Yuzana Company dap jung da ai Bangkok mare na Company wang hpe KIO/KIA gaw 2 lang daram backhoe jak kaba ni hte sa ganaw jahten kau ya sha n’ga, wan nat jahten kau ya ai majaw Yuzana Cammny gaw Hugawng ginra kaw na pru mat wa ai re.
Dai shara hta Yuzana cammny pru wa ai hpang, shawng lawt asuya gaw dai lamu ga ni hpe bai madu da ai rai nga ai.
Dai ning 2023 ning April shata hta gaw Yuzana Company kaw na lamu ga bai lu la ai 2 ning hpring mat tim, shanglaw asuya gaw shi tsun da ai the maren, ya du hkra ginra mung mare masha ni hpe lamu bai ap ya ai lam n’nga shi ai re.
Shanglawt gaw, lamu ga garan ya ai lam rai n’galaw shi ai sha n’ga , dai Yuzana lamu ga shara ni hta, hkau hting hkau na galaw sha nga ai Nawngmi , Warazup mung mare masha ni hpe tsep kawp hkau na n shang na lam shaning ning nan daw hpang de tsun ndau da lam ni mung nga ai re.
Ya ten Shanglawt asuya lamu ga daw gayan ya hkyen ai masing hta, Hpakant ga na kaga amyusha ni mung lawm ai lam chye lu ai re.
