Shiga

Hpyen yen ni mare buga de bai wa na matu garum n’tum ra nga ai

Shwigu ginwang kata, mare kahtawng 12 na hpyen yen mungshawa ni mare buga de bai nhtang wa nga na matu garum n’tum ra nga ai lam, buga masha ni kaw na chye lu ai.

Shwigu ginwang sinpran hkran maga de myen hpyen dap ni htu shadut shang wa nna, mare kahtawng 12 tup hpe wan nat jahten kau ya ai majaw, mungshawa 10,000 daram gaw bum, nam maling kata yi/sun hkauna hkan hpyen koi yen nga ai shata 2 na wa sai re

Ya ten mare buga hpe bai gawgap la lu na matu garum n’tum ra nga ai lam, wan nat jahten kau hkrum ai SiTar mare na hpyen yen mungshawa langai, KNG hpe tsun ai.

“anhte ni gaw ya marang grai nhtu shi ai shaloi wa mayu ai re, marang htu wa yang bum, nam maling hte yi/sun hkauna hkan nga yang grai yakhkak janjau wa na re. Dai majaw, marang grai nhtu shi ai shaloi mare buga de wa nga na hku masing jahkrat myit nga ai re. Dum n’ta ni mung yawng wan nat kau ya sai re majaw, bai gawgap la na matu garum n’tum ni grai ra nga ai” nga tsun ai.

Dum n’ta bai gawgap lu na matu hprisut, moga hte kaga n’ta gawgap arung arai ni ra nga nna, May shata nrai yang June shata praw hkan de gawgap ngut la na hpe hpyen yen mungshawa ni myit mada nga ai re.

Myen hpyen dap, hpyen n’gun 300 jan gaw March 21 ya shani kaw nna shwigu ginwang sinpraw hkran mare kahtawng de shang wa nna, dum n’ta ni hpe wan nat ai hte hpyen n bungli hte bawm jahkrat ya ai lam ni galaw mat ai re.

Wan nat jahten kau ya ai majaw, Man Win mare na htinggaw 129, SiTar mare na htinggaw 100, Man Na mare na htinggaw 57, Tung Kawk mare na htinggaw 41, Si Tawng mare na htinggaw 211, Man Hka mare na htinggaw 35, Si Maw mare na htinggaw 111, Si Mu Gyi mare na htinggaw 28, Si Mu Lay mare na htinggaw 60, Nan Leng mare na htinggaw 130, Nawng Lat Gyi mare na htinggaw 37 tup wan nat kau ya ai lam nga ai hpe chye lu ai.

Related Articles

Back to top button