Shiga

Mung shawa marai 9 sat hkrum ai mabyin hta lit nga ai KIO/KIA lawan hparan ya na matu dum nta masha ni hpyi shawn

Wunpawng Mungdan Shanglawt Hpyendap KIA Dap Ba 2 ginra, Lawa ninghtawn, Magawng Tawng mare hta, mung shawa marai 9 sat hkrum ai mabyin hte seng nna, lit nga ai KIA dap dung 20 ni hku nna tara rap ra ai hku lawan hparan ya na matu dum nta masha ni hpyi shawn nga ai re.

Lai wa sai January 24 ya shani Lawa mare makau, Magawng Tawng mare na Sara Daw Pa hta, Namti mare kaw na Slg.Laude Yaw Han hte rau shi manang ni nga-hkwi sha sa ai ten, KIA hte PDF ni rim woi mat wa ai hking hkum 6 laman hta sha, sat kau hkrum ai re.

Mungshawa marai 9 sat kau hkrum ai shata mi ladu hkrum sai raitim, ya ten du hkra shanhte hpe gara kaw lup makoi tawn da ai lam n tsun dan shi ai majaw, dum nta masha ni hpe shalan shabran kyuhpyi la lu hkra, lawan lajang ya na matu, sat kau hkrum ai Slg. Laude Yaw Han a dum nta masha langai n dai zawn tsun ai re.

“lit nga ai ni gaw anhte na moi mang hpe shaw ya na matu dai ni, hpawt ni nga di gaw tsun taw ai tim nteng mat mat re. Galoi sa woi shaw na kun gara hku bai tsun wa na kun nchye ai. anhte byin mayu ai gaw mang hpe lu da di kyuhpyi la myit shalan la mayu sai. Ya gaw shata mi mung du wa gara hku di baw re mung n chye jam jau taw nga ai” tsun ai re.

Ndai mabyin hta sat kau hkrum ai mung shawa marai 9 gaw, asak 47 ning Slg. Laude Yaw Han, asak 49 ning Slg. Kyaw Soe, asak 56 ning Slg. Lazum Tu Lum, asak 35 ning Slg. Lazum Htoi Shawng (Htun Aye), asak 28 ning Jan Hpauma Hkawn Bu, asak 28 ning Jan Ndau Htu Nan, asak 27 ning Htun Yung, asak 50 ning Slg. Myint Htwe hte asak 27 ning Shd. Hpoe Lay ni rai nga ai.

Slg. Laude Yaw Han gaw Namti Pat Ja San magam hta ningtau ningbaw lit hpe gun hpai taw ai wa rai nna, Jan Hpauma Hkawn Bu hte Jan Ndau Htu Nan yan gaw Monyin, Sahmaw buga hpung masha re ai lam chye lu ai.

Slg. Lazum Tu Lum, Slg. Lazum Htoi Shawng (Htun Aye), Slg.Myint Htwe hte Slg.Htun Yung, dai marai 4 gaw Manmaw Buga Hkalup Hpung Je-In hpung lawk kaw na rai nna, Slg.Lazum Tu Lum gaw Sr. Kaba Lazum La Tsun Masat Gawk Nu Alu Tam Hpa-awn lit hkam re lam chye lu ai.

Rim nna sat kau hkrum ai mung shawa marai 9 hta Slg. Kyaw Soe ngu ai wa gaw Sam Hkyeng amyusha langai rai nna shi a nga shara gaw Mogawng mare kaba kaw na re lam chye lu ai. Dai marai 9 hta Hpoe Lay hkrai sha Slg. Kyaw Soe a jinghku re lam chye lu ai.

Ndai mabyin gaw mung shawa yawng hpe hkrit gahpra kajawng shangun ai re majaw, n tara sat hkrum ai mung shawa marai 9 matu tara rap ra lam pru wa hkra, ginra masha marai 17 lawm ai ‘Lam Tam Komiti’ hpe hpaw nna ya ten shakut nga ai re.

KIA Dap Ba 2 hte KIO/KIA Ginjaw de mung, ndai mabyin hta tara tawt lai ai ni hpe ahkyak la ya na matu hpyi shawn da ai hpe matut chye lu ai.

“anhte gaw masha mat ai mabyin kaw nna komiti hpaw let, sawk sagawn hpang wa rai nga ai. Ya gaw mang hkang npawt byin wa ai hpe jawm sagawn lu saga ai. Raitim sat kau hkrum ai masa lam hpe gaw npawt ndung hkren chye lu hkra naw shakut taw ai. Si mat sai ni na moi mang ni hpe ma lu hkra shaw la na matu rai nga ai. bai nna KIO/KIA maga na mung ndai lam gaw yawng hpe a htu hkra wa mai ai mabyin lam re majaw atsawm sha ahkyak la galaw sa wa na gaw nga tsun da ai. Raitim ya ten du hkra, lak lai lam n nga shi ai” nga nna ‘Lam Tam Komiti’ malawm, mying ntsun wam ai Salang langai KNG hpe tsun ai.

Marai 9 sat hkrum ai mabyin gaw January 24 ya shana, Slg. Laude Ya Han hte manang ni yawng, Magawng Tawng mare na Slg.Kyaw Soe a sun wang hta wu wu di di hpawng chyawm taw nga ai ten, shana 8:00 daram hta KIA hte PDF ni sa rim woi mat wa re lam sawk sagawn lu ai re.

Dai mung shawa marai 9 rim hkrum ai Januray 24 ya shani sha, Mogawng Mungshawa Makawp Maga Dap PDF rai nga ai UG BLACK-K kaw nna, Sam Hkyeng Pyithusit ningbaw Slg.Kyaw Soe hte rau shi masha marai 9 hpe Lawa mare makau hta lu rim ai lam KNG shiga dap hpe tsun dan lai wa sai re.

Dai mabyin hte rau kalang hta, January 28 ya shani Hpakant hte Myitkyina lam n maw kaba ntsa na Myen hpyen du Paing Thu Soe ngu ai wa hpe mung bai lu rim la ai lam UG BLACK-K ni tsun da ai re.

Ndai lam hte seng nna ginra masha ni hpe san yu yang, Slg.Kyaw Soe gaw Sam Hkyeng amyu sha langai re lam chye lu tim, Pyithusit ningbaw rai, n rai gaw tup hkrak nchye ai lam, tsun ai re.

Mung masha marai 9 sat hkrum ai mabyin gaw shinggyim ahkaw ahkang tawt lai ai, kaba dik mara langai re majaw, ja ja ahkyak la ya na matu n dai mabyin hpe chye lawm ai Namti buga na Slg. Langai gaw n dai zawn tsun ai re.

“ndai gaw shinggyim ahkaw ahkang tawt lai ai mung re. Hpyen masa lam hku mung rai rai nbyin gying ai mabyin langai re. Mara kaba ai ni hpe pyi anhte gaw san jep sawk sagawn na galaw sa wa ai baw she re. Ya gaw lani mi lana mi aten sha masha marai 9 sat kau ai ngu gaw labau hta ma n tsawm sai. Bai nna shanglawt hpe ya ten yawng e mung masan sa ai hku na hkap la da ai ten re majaw myit yu ra ai. Dai majaw shi htung nga ai hte maren lawan galaw ya ra ai” nga nna hpyi shawn ai re.

Ndai mabyin gaw dai ni, shata mi ladu hkrum sai rai nna, seng ang ai Shanglawt Asuya kaw nna lawan lit la hparan ya ra ai lam  hpyi shawn ai re.

Matut nna, Slg. Laude Yaw Han a dum nta masha langai mung, KIO lit nga salang ni hpe ndai zawn hpyi shawn da ai.

“Anhte ni gaw ya na zawn kalang ma nhkrum sha yu ai. Ya ten gaw anhte dum nta masha ni gaw myit ru tsin yam hkrum sha taw ai ten re.  Ndai hpe KIO asuya kaw nna gara hku lit la ya na ngu sha chye mayu ga ai. KIO ngu gaw anhte a matu kam hpa gying ai asuya langai re majaw ndai mabyin seng na lawan hparan ya na hpe sha ra ai law

Ndai lam hpe KIA hpyendap hku nna komishin hpaw sawk sagawn taw sai lam, Wunpawng Mungdan Shanglawt Hpung KIO Ginjaw, Shiga Dap Lit Hkam Dukaba Nhpang Naw Bu, KNG hpe tsun ai.

“dai daw gaw hpyendap kaw nna komishin hpung hpaw nna jep sagawn ai madang kaw rai taw nga ai. Hparan ai daw gaw rai ndu shi na re.”  nga nna tsun ai.

Danai lido lam ntsa, Lawa mare makau hta ya na zawn mung shawa marai 9 sat hkrum ai mabyin a shawng daw, ya sat kau hkrum ai Slg.Kyaw Soe hte ginra masha nkau lapran, lamu ga manghkang loi li nga ai lam, tsun nga ma ai raitim tup hkrak nchye lu shi ai re.

Mung shawa marai 9 hpe hpa majaw KIA dung 20 hte PDF ni sat kau ai ngu ai hte seng nna, lit nga ai Shanglawt Dap lit hkam ni sang lang dan ai lam sha n rai yang, kadai mung chye na matu yak nga ai re.

Related Articles

Leave a Reply

Your email address will not be published. Required fields are marked *

Back to top button