Hpungkyi Jawng kaw Makoi Rawng Nga ai Myen Hpyen Dap ni, Laknak kaba hte gasat hkrum

Majan byin ai shara

Hpakan Gwi Hka mare makau na Sap Pya Chaung mare a Hpungkyi jawng hta Myen hpyen dap ni wa du shara jahkrat nga ai ten, Wunpawng Mungdan Shanglawt Hpyen Dap KIA ni, November 17 ya jahpawt 7 chyen daram aten hta laknak kaba 2 lang gap bun nna, Myen hpyen dap maga si hkala hkrum wa ai lam chye lu ai.

Dai Hpung kyi jawng hta lagu rawng nga ai Myen hpyen n gun 60 ram hpe KIA Dapba 9 kaw na laknak kaba sa gap bun ai hta, Myen hpyen dap maga de na marai 5 si nna, n kau hkala hkrum wa ai lam shawng lam shi sawk ni tsun dan ai kaw na chye lu ai.

“Dai Myen hpyen dap ni gaw, 15 ya shani Nyaung Htauk Kung hta hkap gap hkrum ai Myen ni rai nga ai. Dai hkap gap hkrum ai kaw sum machyi ai majaw, bai n htang yu mat wa ai. Rai nna, htaw laga lam hku bai lagu lung wa na, Sap Pya Chaung mare hpungkyi jawng hta wa lagu rawng nga ai rai nga ai. dai lagu rawng taw ai chye ai majaw, anhte maga na ni sa gap bun ai rai nga ai” nga shawng lam magam gun langai KNG shiga dap de tsun dan wa ai.

KIA maga na dai zawn laknak kaba sa gap bun ai hpang, Myen hpyen dap maga na mung shani ting ngu na Laknak kaba hte KIA PDF dap ni nga ai shara maga gap bun wa ai re lam chye lu ai.

Dai Myen hpyen dap ni gaw, lai wa sai November 15 ya shani Nyaung Htauk Kung hta  mung gap gasat hkrum ai dap ni rai nna, ndai kalang gaw, kaga lam hku lagyim shang wa ai mung re lam chye lu ai.

Ndai zawn, laknak kaba gap hkrum ai hpang, lahkawng maga majan matut byin wa sai rai nna, lahkawng maga kade si hkala ai lam nga ai hpe gaw, nchye lu shi ai.

Dai Myen hpyen hpung ni ya ten Sap Pya Chaung mare na Bai Nam rem sha taw ai mung mare masha marai 6 hte lung seng htu taw ai marai 7 hpe lam madun hku rim woi mat nna, Kawa Bum maga de bai shamu mat wa ai lam, shawng lam magam gun ni matut tsun wa ai.

Hpakan ginra e, Myen hpyen dap gaw, mung shawa ni a pru hkawm sa lam ni hpe laja lana jep joi let, shana ten lai hkawm ai ni hpe gap sat ai lam mung byin nga ai ten rai nga ai.

Read Previous

Muse ginra Myen Hpyendap Laknak Gap Bun ai majaw, Mungshawa ni Si Hkala hkrum

Read Next

Myen hpyendap ni Mungshawa nga ai mare de laknak kaba gap bang

Leave a Reply

Your email address will not be published. Required fields are marked *