Myitkyina Kata Mawdaw Sengke Laja Lana Rim Jep

Myitkyina Muklum Kata Mawdaw Sengke Laja Lana rim jep

Myen hpyen dap hte Balik ni pawng hpawm nna, Myitkyina Muklum kata pru shang lam ni hta, Mawdaw Sengke yawng hpe Lai Sin jep ai lam ni galaw taw ai lam chye lu ai.

Dai hpawt manap hkying 9 ram aten kaw na Myitkyina numshang Pang Mati lawk hte Myitkyina Bala Min Htin mahkrai n pu, n tsa hkan laja lana san jep taw ai re lam ginra masha langai KNG de tsun wa ai.

“Myen Hpyen la hta Balik ni tsawm ra law hkra rai na, lai sa lai wa ni yawng hpe hkap jahkring na Lai Sin hkap jep ai, n lawm tim gaw bai lai shangun ai, n kau gaw gumhpraw jaw na bai lu lai wa ai ni mung nga sam ai, ya ten du hkra chyawm mawdaw zing mat wa ya ai nga rai nna shi ai.”

Hkrun lam hkawm mung shawa ni hpe mung, Mung Chying masat san jep ai lam hpe Express Mawdaw kaba ni hta laja lana san jep nna, shan hte n tsen ai ni hpe lam yu hkawm shangun ai lam ni galaw nga ai lam chye lu ai.

Myitkyina Shatapru lawk hta nga ai Duwa Lahkri La Awng mung shi sun kaw na wa ai ten, lam kaw hkap jep hkrum nna, shi hta lawm ai, sun sa nhtu n-ga hpe mung la kau ya ai lam shi Facebook hta tsun da ai.

Myen hpyen dap ni dai zawn, laja lana san jep wa ai lam gaw, rawt malan wuhpung ni kaw na Mawdaw, Sengke ni hte Myen hpyen dap a shara ni hta bawm sa kapaw ai lam ni jahkring hkring galaw ai hpe hkang zing lu na matu myit mada let galaw wa ai re nga, Myitkyina ginra masha ni mu mada ai lam tsun ai.

Myen hpyen dap daru magam zing kau ai hpang, Myitkyina muklum kata Mawdaw Sengke Lai Sin rim san jep wa ai gaw, ndai shawng ning nan lang re lam chye lu ai.

Read Previous

Myen hpyendap ni mung shawa nga ai Mai Ja Yang kata de laknak kaba gap bun

Read Next

Tingkawk hte Nam hpyek lapran Myen Hpyen Hpung ni gasat hkrum

Leave a Reply

Your email address will not be published. Required fields are marked *