Lido lam kaba, Dum Bang mare hta dap jung shara jahkrat tawn ai, Myen hpyen dap Hk.L.Y (298) dap n gun 60 ram hpe, Jahtu Zup de lai lung wa ai ten lam lapran kaw Hkam Bawm hte hkap kapaw nna, Myen hpyen la 2 hkala hkrum ai lam chye lu ai.
Mana August 11 ya shana maga hkying 6 ram aten Dum Bang kaw na Nawng Mi maga de hkau na pa lam hku na lai lung wa ai ten, KIA hkap kapaw nna dai zawn hkala hkrum ai hpang, makau grup yin ni de sinat gap shadam wa ai lam, ginra masha ni tsun dan ai.
“Mana maga hkying 6 ram aten Nawng Mi mare ding sa kaw Bawm ngoi ai, dai hpang Myen hpyen dap ni makau grup yin de sinat gap shadam ai dai ram sha re, grai wa majan kaba byin ai hku gaw n re,” nga Nawngmi ginra masha langai KNG shiga dap de tsun dan ai re.
Dai Myen hpyen hpung ni gaw, mani hpawt majan byin ai Jahtu Zup de hpyen garum lung wa ai hpyen hpung ni rai nna, Pyi Thu Tsit hpyen hpung ni Nawng Mi mare kaw na wa tau la ai lam chye lu ai.
Ya ten Hugawng lido lam kaba mayan kaba hta KIA hte Myen hpyen dap Pyi Thu Tsit pawm hpawm hpung ni hpyen masa shaja hkat taw ding yang rai nna, lai sa lai wa mung shawa ni hpe laja lana san jep ai lam ni galaw taw ai lam ginra masha ni tsun dan ai re.