Sanpya Pyi Thu Tsit dap hpe KIA sa htim kasat ai hta KIA magam gun 1 hkrat

Hugawng Lido lam, Jahtu Zup Sanpya mare hta dap jung tawn ai, Sanpya Pyi Thu Tsit hpyen dap hpe Wunpawng Mungdan Shanglawt Hpyendap KIA Dung (14) ni, dai hpawt August 11, manap hkying 3 ram a ten sa htim gap gasat wa ai hta, KIA magam gun 1 si nna, 1 hkala hkrum wa sai lam chye lu ai.

Pyi Thu Tsit a dap hte laja lana majan byin wa nna, dap kata hkra hten ai lam loi li sha nga ai raitim, tinang KIA maga dai zawn hkra machyi wa ai re lam, Sanpya mare masha langai ni tsun ai gaw,

“Dap shara hpe lu gasat zing la ai nga gaw nnga ai, anhte maga de na langai hkrat sum nna, langai hkala hkrum ai nga na ai, anhte maga na laknak kaba si ni hte gap bun ai majaw, Pyi Thu Tsit dap shara hten ai lam loi li nga ai nga na ai.”

Dai zawn gap gasat wa yang, Jahtu Zup Myen hpyen dap Hk.L.Y (297) dap na, lak nak kaba ni 20 lang jan gap garum bun wa ai majaw,  si hkala hkrum ai rai nna, Sanpya mare mung shawa n ta de wa hkrat ai lam hpyen yen langai  matut tsun wa ai.

“An hte hpyen yen dabang kata laknak si kaba wa hkrat ai, hpyen yen dabang kata na Wa lawng makau kaw langai wa hkrat nna, mare kata na n ta n kau hte laika sharin jawng ni hkan mung wa hkrat ai” nga KNG shiga dap de tsun dan wa ai re.

Dai hpawt manap gap gasat ngut ai hpang Pyi Thu Tsit maga de na Drone hte gayet da ai sumla hta KIA maga na hting nut mat wa ai ten si ai langai lawm nna, hkala hkrum ai langai mung lawm ai lam dai sumla hta mu lu ai re.

Pyi Thu Tsit dap maga na mung si sum ai lam ni nga ai nga, tsun taw ai rai tim, KNG na lak san san shateng lu ai lam n nga ai re.

Myen hpyen dap daru magam zing kau ai hpang, Jahtu Zup Min Zin Tant woi awn ai Pyi Thu Tsit dap shara hpe KIA kaw na 3 lang hta n-ga sa htim gap gasat nga ai re.

Hugawng Lido lam hta Sanpya mare hta dap jung shara jahkrat tawn ai Sam Hkyeng Min Zin Tant woi awn ai Pyi Thu Tsit hpyen hpung ni gaw, San Pya, Jahtu Zup, Kai Taw maw shara ni hta hpyen dap hpe ngang ngang kang kang dap shara jahkrat da nna, madang tsaw ai laknak ni hte shaman shakyang ai lam ni ding yang galaw nga ai re majaw, KIA kaw na sa htim gap gasat na yak hkak wa ai re lam ginra masha ni tsun ai.

Dai ginra hta majan byin ai majaw, dai hpawt manap gat seng hpaw ai lam ni mung n nga ai sha n ga, shinggan de masha pru hkawm ai lam mung n nga ai re hpe chye lu ai.

Read Previous

Sezin Mare de Nbungli Wan Bawm Gap Hkrum nna, nta 400 jan hkru, mare masha si hkala ai lam law

Read Next

Myen Hpyen Dap hte Sam Hkyeng Dap ni Pat da ai Sezin Mare Masha ni hpe bai dat ya

Leave a Reply

Your email address will not be published.