Namti mare hta PSI (salawng) shakap da ai dum nta ni hku nna lawan zing kau na matu hte matsun nhkan ai ni ahkyak la hkrum na re nga nna Myen hpyendap a salung sala uphkang salang ni hte pyada ni hkan tsun ai lam chye lu ai.
April 27 ya shana hkying 9 daram hta Namti mare salang wa hte pyada ni gaw, mare ka-ang lam hku lai nna, nsen htawn jak hte hkan marawn ai nga nna, Lam Braw Yang ginra masha langai ya na zawn tsun dan ai re.
“Shanhte gaw tara nshang ai Htai PSI (salawng) lang taw ai ni lawan run kau ya na matu n sen htawn jak hte hkan jahtau ma ai. N run yang gaw tara upadi hte ahkyak la na da” nga nna tsun dan ai re.
Bai nna shana hkying 8 kaw nna jahpawt hkying 4 laman shing gan npru hkawm na matu hte nta nta lak nak lama ma kyem da ai rai yang lawan sa ap na matu tsun ai re hpe mung chye lu ai.
Namti e, shawng de mung PSI (salawng) lang ai hpe mu yang, gumhpraw 20,000 kyat dam gayet na nga nna uphkang salang ni kalang mi jahkrit ga sai lam chye lu ai.
Ya ten hta Myen mung ting madang mobile internet line pat da ai majaw, mung shawa ni gaw PSI (Salawng) kaw nna sha shiga hkap madat nga ra ai re.
