Nawku Jawng Wang Kaw Dap Jung Shara Jahkrat Nga ai Myen Hpyendap Shara Ni hpe Gun kau ya na Matu Nawku Hpung Ni Hku Na Dukaba Yar Pyi hpe Hpyi Shawn
Wunpawng Htunghking Nlung Nnan Sha Poi de sa du ai Myen Hpyen Dukaba Yar Pyi hte Nawku Hpung ningbaw ni hkrum ai ten, Nawku Jawng Wang kaw dap jung tawn ai Myen Hpyen, Pyithutsit dap shara yawng gun kau ya na matu hpyi shawn wa ai lam chye lu ai re.
Nov 16 ya shani Dukaba Yar Pyi hte Jinghpaw Mung kata nga Nawku Hpung Ningbaw ni hkrum jahta ai ten tsun hpyi shawn wa ai re lam, Asuya Salang hte ni nawn ai ni kaw na chye lu ai re.
“Nawku Hpung Ningbaw ni hte hkrum ai shaloi gaw Nawku Jawng wang kaw dap jung tawn ai dap shara ni hpe yen ya na matu hpyi shawn wa ai nga na ai le,” nga tsun ai re.
Dukaba Yar Pyi Jinghpaw Mung de Wunpawng Htunghking Nlung Nnan sha poi lamang de sa du ai laman, Jinghpaw mung kata nga Nawku Hpung ningbaw ni, Htunghking bawsang shagu na ningbaw ni, PCG Salang ni hte alak mi hkrum jahta bawngban wa ai lam nga ai hpe chye lu ai.
Nawku Hpung Ningbaw ni hte hkrum jahta ai ten, Nawnglut Pa, Na Mawn Mare, Nawng Ing Buga hpung kaw dap jung nga ai SNA Pyithutsit hpyen dap hpe yen ya na matu hte, Hpakant Anglican Nawku jawng kaw dap jung tawn ai Myen hpyen dap shara ni hpe htawt sit kau ya na matu alak mi hpyi shawn wa ai lam sagawn chye lu ai re.
Nawku Jawng wang kaw dap jung tawn ai ni hpe yen ya na matu November 16 ya shani tsun hpyi shawn wa ai rai tim, dai ni November 19 ya shani du hkra gaw yen ya ai lam rai n nga ai hpe sagawn chye lu ai.
Ya ten Myitkyina kaw Masha Kaba du nga ai ngu gabaw hte Mogaung hte Waimaw grup yin ni de hpyen shamu shamawt ai lam ni galaw nga ai hpe KIO Shiga lawk ni kawn chye lu ai re.
Myen Hpyen Dap Simsa lam tam komiti Ningbaw Dukaba Yar Pyi hte Hpyen Asuya wuhpung ni gaw, November 16 ya jahpawt Myitkyina de du wa nna, November 17 ya shani Jinghpaw Mung Asuya kawn woi galaw ai Wunpawng Htunghking Nlung Nnan sha poi lamang de sa du shang lawm wa ai rai nga ai.
Dai poi lamang sa lawm let, Jinghpaw mung kata na Nawku Hpung Ningbaw, Htunghking hpung Ningbaw, PCG ni hte alak mi hkrum la ngut ai hpang, mani November 18 ya shani bai n htang yu wa sai lam mu chye lu ai re.
Myitkyina Muklum kaw dai ni du nga ai ten, lam n jut shagu Balik ni sha n ga, Hpyenla ni mung sinat hkinghku hkum hkra hte shim lam la ya wa ai hpe ginra masha ni tsun shana ai kaw na chye lu ai.



