Waimaw ginwang, Nang Zaw mare makau na Wunpawng Mungdan Shanglawt Hpyendap KIA dung 3 shawng lam dap langai hpe Myen hpyendap kaw nna laknak kaba hte gap bun ai lam chye lu ai.
January praw 7 ya jahpawt hkying 9 daram kaw nna shana de du hkra yawm htum lak nak kaba 10 lang daram gap ai nsen ai na lu ai lam dai ginra hta yi galaw ai mung shawa ni tsun ai re.
Ya na zawn sinat kaba gap bun ai majaw, dai ginra bum yi galaw ai ni mung jahkring gan yen nga ai lam chye lu ai.
Lai wa sai November shata daram kaw nna Nang Zaw mare maga de Myen hpyendap ni shamu shamu shamawt hkawm wa ai majaw, bum yi galaw ai ni hpe lawan mam mu, mam dan la na matu Shawng lawt hpyendap maga sadi jaw da ai lam ni nga ai re.
Bat 4 ya shani Myen hpyendap ni laknak kaba gap bun ai hte seng nna Wunpawng Mungdan Shanglawt Hpung KIO shiga dap lit hkam Du kaba Naw Bu hpe san yu ai shaloi, ya na zawn tsun ai re.
“3 lang daram gap ai nga, mani hpawt rai ang sai. Lak lai ai shiga hpa matut ai gaw nna lu shi ai law. Gara kaw na post kaw nna gap bang ai kun atsawm nchye lu shi ai. Matut na mung shiga hpa nga nrai shi ai. Grai lak lai ai lam gaw nrai kun?” nga nna tsun ai re.
Jinghpaw Mungdaw kata Asuya dap hte Wunpawng Mungdan Shanglawt Hpyendap KIA lapran majan byin ai lam nnga ai na sai raitim, hpyen masa shaja hkat ai lam ni gaw shara shagu hta matut nga ai lam chye lu ai.