U.S. a Taiwan hpe torpedo dut jaw na lam Miwa pawt

Hka Shang Sanghpaw (Submarine) kaw nna gap ai madang tsaw ai laknak, MK 48 Mod6 torpedo. Sumla: Raytheon Technologies

U.S. gaw, Miwa a daw chye hku hkam la ai, Taiwan hpe dollar wan $180 grupyin manu madang tsaw ai torpedo 18 dut jaw na masa a majaw Washington hte Beijing lapran shaja hkat nga chyalu matut mahkai lam gaw grau jat wa na lam byin nga sai.

Kaga mungdaw law law zawn, U.S. mung Taiwan hte sumtsan salang matut mahkai lam n nga timung, democracy zunlawng mungdan a madu hkum makawp maga lamang hpe upadi masa hku maga lawm ai lam galaw ai re. U.S. laknak ni Taiwan hpe dut jaw ai lam ntsa Miwa ja ja ninghkap nga dingyang re.

U.S. Maigan Kyithkai Dap gaw Taiwan hpe torpedo 18 (MK-48 Mod6 Advanced Technology Heavy Weight Torpedoes) hte hkinghku ni yawng ntsa lam dollar wan 180 manu dut shalai na masa hpe U.S. Maigan Kyithkai Dap hkapla sai nga, U.S. DSCA (Defense Security Cooperation Agency) a May 20 ndau hta tsun ai.

MK-48 Mod6 torpedo, hka kata kaw nna sanghpaw gap laknak, hpe Amerikan company Raytheon Technologies kaw nna gyin shapraw ai re.

Taiwan gumsan magam Jan. Tsai Ing-wen a lahkawng lang ningdaw daru magam hkam la ai May 19 a hpang shani, ya na zawn U.S. a laknak dut jaw na ndau pru wa ai mung re.

Shawng de Japan uphkang lai wa sai Taiwan hpe 1945 hta Miwa hpe ap ya sai raitimung Mao Zedong a kummyunit hpung ni daru magam madu la ai 1949 hta bai ga garan wa ai re.

Miwa gaw, madu uphkang nga ai Taiwan hpe ‘shanglawt’ ndau ai galoi mung ahkang jaw na n re zawn U.S. maga Taiwan hte kyithkai ai lam hte laknak dut jaw ai lam ni hpe galoi mung ja ja dinglun ai re.

Read Previous

Mungkan COVID-19: Langai Ya shani si ai 3,000 jan

Read Next

Brazil COVID-19 kap bra madang mungkan No.2 de du wa

Leave a Reply

Your email address will not be published. Required fields are marked *