U.S. Covid-19 si jahpan mun sanit du sai

Pfizer hte BioNTech yan galaw shapraw ai Covid-19 makawp ninghkap tsi (vaccine). Sumla: Reuters

Pfizer hte BioNTech yan galaw shapraw ai Covid-19 ninghkap tsi (vaccine) amyu mali hpe U.S. kaw masha kaja ni hta htu chyam yu ai lam galaw nga sai. Sumla: Reuters

Covid-19 ana zinli hte, bat Lahkawng Ya du hkra U.S. kaw si ai masha jahpan mun sanit jan sai re.

May praw 5 (Sinpraw nhtoi May praw 6) du hkra, Johns Hopkins dakkasu a jahpan hte maren, U.S. kaw coronavirus snr Covid-19 ana kap masha 1,203,502 hta e si ai marai 71,022 rai sai re.

Ya ten mungkan e mungdan, ginra 187 hta ndai ana chyam bra nga nna, ana kanu mu jep lu ai machyi masha yawng 3,651,010 hta e si gaw 256,736 rai nna, dai hta Amerika gaw na du dik re.

Myen mung kaw ana kap ai masha yawng 161 hta Jinghpaw mungdaw na 1 rai lawm nna, si ai yawng 6 re lam, asuya Hkamja Dap hte Ginsup Hkringmang Dap a May praw 5 ndau hta mu lu ai.

Masha kaw Covid-19 Makawp Maga Tsi Chyam Nga

Shawng n’nan Pfizer hte, shi hte gindun ai BioNTech yan shapraw ai coronavirus makawp maga tsi (vaccine) hpan mali hpe Amerika e chyam hpang nga sai lam, sawk sagawn ai ni May praw 5, bat Lahkawng Ya, shani tsun wa sai.

Nsa shaw lam hta byin ai ana zinli ninghkap lu ai, Pfizer hte Germany na BioNTech yan galaw ai vaccine ni hpe hkam ja ai masha hta htu chyam nga sai lam hpe Amerikan tsi dakkasu lahkawng, Manhattan mare New York University Grossman School of Medicine hte Baltimore mare University of Maryland School of Medicine, na sawk sagawn ai ni hpaw tsun ai re.

Pfizer hte BioNTech yan na vaccine tsi ni hpe masha kaba asak 18 kaw nna 55 ni kaw shawng chyam ai kaw nna asak grau kung ai ni kaw mung chyam yu wa na re nga, Pfizer tsun ai.

Marai 360 hta chyam da ai mahtai hpe du na shata chye wa lu na re nga, tsun ai.

Maga mi de, Moderna Inc. hte Oxford University ni galaw shapraw ai Covid-19 makawp maga tsi (vaccine) ni hpe mung masha hta htu chyam ai lam ni galaw nga ai re.

Pfizer gaw kade n na ten Covid-19 vaccine ni hpe shi a tsi jakrung U.S. Massachusetts, Michigan hte Missouri mungdaw ni hta sha n ga Belgium mungdan Purrurs hte laga shara ni hkan e mung galaw shapraw wa na ginshan jahkrat tawn ai re.

Read Previous

COVID-19: KIO Dingdung Ginwang de masha pru-shang pat hkum

Read Next

Gala Nbung Dap MiG-29 jet pyenli hkrat kapaw

Leave a Reply

Your email address will not be published. Required fields are marked *