Hugawng Pa ginra masha ni a ‘sai kap ai pat’

Mungkan Pat nhprang yawng hta manu dan dik pru ai shara Hugawng Pa hpe Myen hpyendap gasat zing la kau ai gaw dai ginra na chyauman buga masha ni hpe gawt shapraw kau ai re nga ‘Sai kap ai Pat’ mying ai dai ni shapraw ai sumtang laika hta mu lu ai re.

Ndai sumtang laika hpe August 20 ya shani Yangon Orchid Hotel e ginra masha ni hte Jinghpaw Wunpawng Bawngring Mahkri Shawn Hpung KDNG sang lang mat wa ai re.

“Sai kap ai pat maw ngu tsun mayu ai ga re. Hpa majaw nga yang, mungkan hta manu dan dik nhprang rai tim, ndai hpe sai gama nna htu la ra ai. Ginra masha ni a hkrap myiprwi hte hpring ai shara rai nga ai” nga nna Jinghpaw Wunpawng Bawngring Mahkri Shawn Hpung KDNG na Slg. Tsa Ji tsun ai re.

Shawng de Pat nhprang hpe dam lada ai hku jai lang ai lam n nga tim, htingbu Miwa mungdan mari hpang wa ai 2011 kaw nna 2017 majan nbyin shi ai ten du hkra laja lana htu sha ai rai nna, Myen mung ginra shara shagu na htawt sit mu galaw masha mun lam gaw Hugawng Pa de shawng wa ai re.

Maw ginra na htu la lu ai Pat ni hpe Danai mare de du hkra hkali hte htaw la nhtawm, dai kaw nna law malawng gaw Miwa mung de dut ginlen ai re.

Raitim 2017 June shata praw 5 ya shani gaw Danai Pat maw, Ja maw hkan na mungshawa hte htawt sit bungli galaw hkawm ai ni yawng dai ginra kaw nna pru mat wa na matu Myen hpyendap gaw hpyen nbungli hte laika pa a gat shabra dat sai re.

Dai hpang majan laja lana byin wa ai majaw maw ginra rai nga ai Nambyu Namhkam, N-ga ga, Wai Law, Htang Bra hte Nam Gawng mare masha hkying kaba gaw Danai mare de hpyen yen sai rai nna, bu htawt bungli galaw masha ni mung hprawng yen mat ai re.

“ndai ginra gaw bu htawt ginra ni a tam lu tam sha shara nre. Anhte kaji kawoi ni ban hte ban shara jahkrat nga lai wa ai anhte shara re. Hpyendap gaw anhte hpe hpyen majan htim gasat nna, lamu ga maden la ai ngu mu ai” nga nna shi sanglang hpawng e Nambyu Namhkam ginra masha Jan Lu Seng tsun mat wa ai re.

Majan zim nga ai maw ginra ni hta ya ten Ja hte Pat htu sha ai lam hpang wa sai zawn, seng ang ai asuya rapdaw salang ni mung tara shang htu sha lu na matu lahta tsang de laika bang da ai re.

Raitim, ndai zawn simsa lam n-nga shi ai ten, hpyen yen ni mung tinang dum nta nlu wa shi ai ten, bu htawt masha ni hpe Ja htu, Pat htu sha na matu ahkang jaw na hkyen ai gaw NLD asuya shut ai lam Slg. Tsa Ji madi madun tsun mat wa ai re.

Bai nna ginra masha ni mung tinang dum nta wa na matu mungdan gum san magam hpang de laika bang da ai raitim, ya du hkra dum nta nlu wa shi ai re.

Myen hpyendap a Pat maw Ja maw zing ai majan majaw, dai ginra chyauman buga masha ni gaw ya yang Danai mare ntsa Nawku hpung ni a hpyen yen dabang hta sha shingbyi ra nga ai re.

KDNG lit la shapraw ai ‘sai kap ai pat’ ngu sumtang laika buk a matu aten ladaw 2 ning daram na ai rai nna, Pat maw ginra masha ni, Danai mare masha ni, sut hpaga hpung ni, makam masham ningbaw ni hte ginra daju wuhpung wuhpawng ni hte hkrum zup wa ai lam chye lu ai.

Exit mobile version