Tag Archives: KIO

Dingsing Pa hta KIO ga sau htu hkyen ai hpe Ginra masha ni ning hkap

Wunpawng Mungdan Shanglawt Hpung KIO asuya ahkang hte N Ba Pa, Dingsing pa ginra hta ga sau (Rare Earth) htu shaw ai lam hpe tsep kawp jahkring kau na matu, ginra masha ni shawa n gun madun let ning hkap nga ma ai re.

Dai ni, January 16 ya shani kalang bai, Manmaw ginwang, N Ba Pa, Dingsing Pa ginra mung shawa yawng marai 200 Jan shanglawm let, Ga sau htu shaw na matu galaw nga ai bungli dabang shara hta nan sa let, shawa n gun madun ning hkap wa ai lam chye lu ai.

“Dai ni gaw, Hpyen yen na ni mung tsawm ra mi lawm ai, KBC gaw Manmaw ginwang ningbaw wa ma lawm ai. Manmaw Jau ginwang ni ma lung wa ai. Nmawk Jau ginwang ni ma sa ai. Ban hkak Jau ginwang ni ma sa ai. KIO gaw lu galaw hkra gaw ngu ai da raitimung gara hku byin wa na atsawm n chye ai.” nga nna Dingsing Pa ginra masha langai KNG hpe tsun dan ai re.

Lai wa sai bat 6 ya, January 13 ya shani hta mung, ginra mung shawa 200 jan, shawa n gun madun wa sai rai nna, dai ni mung kalang bai, Buga hpung ningbaw ni, hpyen yen mung shawa ni, mare masha ni yawng marai 240 Jan hte, Kalang bai shawa n gun madun ninghkap ai re lam chye lu ai.

Dai sha n ga, n dai ginra ni hta, Ga sau htu shaw ai lam tsep kawp jahkring ya na matu, KIO Ginjaw rung de mung, ninghkap laika bang ai lam nga ai hpe chye lu ai.

Ga sau htu shaw ai lam gaw, tu matu hkrung mahkrung hpe hten za htum mat shangun mai ai majaw, dai masing hpe tsep kawp jahkring lu hkra ninghkap ai re nga, Dingsing Pa ginra masha langai KNG hpe matut tsun ai re.

“ya n dai hpe gaw, kaja wa nan ninghkap lu hkra galaw na matu, anhte ni gaw dai hku na nan, myit tawn da sai re. n dai gaw n kaja ai re yawng hkra chye ai. Dai ni anhte asak aprat kaba sai ni chyawm shi hkrai shi lai mat sai rai. Woo anhte kashu kasha ni a matu, galu gaba hkra sa wa na lam hta dut dang wa ai lam law law byin ai majaw, buga masha ni, gai dawng gai da ma hkra gaw, mung shawa yawng, nga yak jam jau wa ai baw re ngu ai hpe yawng chye na hkrawn hkrang mat ai re majaw, Dai ni n dai zawn rai ninghkap nga sai ka re.” tsun ai re.

N dai lam hte seng nna, KIO Ginjaw shiga dap lit hkam, Du kaba Nhpang Naw Bu hpe KNG kaw nna, Ph the matut mahkai san ai shaloi, Sinpraw ginwang ginjaw de na mung, Jahkrup bawng ban nga dingyang re majaw, dai ngut yang she ginjaw de du na re majaw, dai ni du hkra gaw, hpa mahtai n lu shi ai lam sha tsun wa ai re.

Mai Ja Yang hte Loije Lam lapran na, Gau Ri krung hta mung, ginra masha ni hpyen yen mat ai hpang ginra lamu ga hpe KIO hte miwa Lauban Company ni Ga sau htu shaw sha kau sai re.

Ya matut nna mung, N Ba Pa, Ding Sing Pa ginra hta Gau sau htu shaw na matu Lamu ga htu chyam ai lam ni, ginsum gap da ai lam hte Arung arai yawng htaw sa da nna, Ga Sau htu sana Ri Ri rai nga sai majaw, Ginwa masha ni mung, Shawa n gun the Ja Ja ninghkap wa ai lam rai nga ai.

KIO gaw, Dingsing Pa ninghtawn kata kaw, Ga sau htu shaw ai lam malawng galaw na matu gya nga ai sha n ga, Sadung bum ninghtawn hte Bum sen bum de mung Ga sau htu na gya wa ai lam ni nga taw sai nga, Ginra masha ni tsun ai re.

Mungshawa kam hpa ai KIO asuya kaw nna, Mungshawa makam yawm hkra n galaw ging ai zawn, mung shawa n sen hpe madat nna, Asuya bungli hkrak tup galaw ging ai lam Kachin CSO wuhpung langai hta shamu shamawt bungli galaw nga ai mung shawa langai gaw shi a ningmu hpe n dai zawn tsun ai re.

“Anhte buga mare masha ni a, Opinion (Ningmu) ni hpe mung hkungga ging ai ngu mu ai. Mungshawa myit makam yawm magang, anhte a asuya magam bungli ni yawm magang rai na, Asuya langai ngu ai gaw, Mungshawa hpe makawp maga na matu, Mungshawa hpe madi shadaw na matu, nga ai asuya rai nga ai the maren dai magam bungli ni hpe mung manu shadan, mung shawa hpe mung manu shadan hkungga la ra rai nna, Mungshawa n sen hpe atsawm sha madat nna, htap htuk ai hku hparan hpareng galaw mat wa jang gaw, grai htap htuk na re ngu tsun mayu ai.”

KIO uphkang ginra, Sinpraw Ginwang Ginjaw, Manmaw- Mai Ja Yang- Loije- N Ba Pa, Ding Singpa ginra ni hta, KIO asuya hku nna, Miwa Lauban Company ni law law hpe jashawn let Ga su htu shaw nga ai gaw 3 ning jan wa sai rai nna, ya kalang bai Dingsing Pa ninghtawn kata, matut htu shaw na hkyen nga ai lam rai nga ai law.

U Byit Mungshawa Dum Nta langai hpe Myen Hpyendap Jahten Kau Ya

Myitkyina Ubyit mare na, rim hkrum ai hta lawm ai KIO Salang Kaba langai a Jinghku n ta hpe Myen hpyen dap ni dai hpawt manap, Backhoe hte sa ganaw jahten kau ya wa ai lam chye lu ai.

November 16 ya jahpawt jau hkying 5 ram aten, Myen hpyen mawdaw 5 hte hpyen n gun 50 ram lawm ai hpyen hpung ni sa wa nna, sa ganaw jahten kau ya wa ai lam Ubyit ginra masha langai KNG shiga dap de ya na zawn tsun dan ai re.

“KTV hta rim hkrum ai salang kaba ni hte matut mahkai nga sam ai. Dai kaw na Salang Kaba langai hte Jinghku re nga tsun ai, dai hpawt jau hkying 3 ram aten mawdaw 5 Hpyen n gun 50 ram hte rai na sa hpya kau da ya ma ai, n ta gaw hpun pyen n ta htap lahkawng re.” nga tsun dan ai re.

Myen hpyen dap ni dai n ta hpe, mani November 15 ya shani kalang sa wa let, nta kata sa shang jep kau da ai rai nna, manu dan ai Ja, Gumhpraw n kau mya la mat wa ya ai lam matut chye lu ai.

Lai wa sai November 12 ya jahpawt Myitkyina Dapkawng Happy KTV hta KIO magam gun Salang kaba marai 13 hpe myen hpyen dap ni rim woi mat ai hpang, ya ten dai ni hpe san jep let, shara hkan madun shangun ai lam ni galaw taw ai re hpe chye lu ai.

Dai zawn shanhte hte matut mahkai ai ni hpe hkan jep rim hkawm taw ai majaw, mung shawa n kau hkrit maja let sha nga taw ra ai lam chye lu ai re.

Hpakan ginra, Myen hpyendap gun rai dut ginlen ai lam yawm nga sai kun?

Hpakan ginra hta Wunpawng Mungdan Shanglawt Hpung KIO kawn, Hkum pat tawn ai Myen hpyendap gun rai ni hpe mungshawa ni lapran, brang brang lang lang dut mari ai lam yawm nga sai hpe chye lu ai.

KIO kaw nna, Hpyendap Gunrai ni hpe, dut mari jai lang ai lam n galaw na matu, n dau laika shapraw ai hpe myit hkrum ai mungshawa ni hkan sa ai nga ai hpe mu lu ai lam, hpakan ginra masha langai KNG shiga dap de ya na zawn tsun ai re.

“Law malawng seng n kau gaw madat mara ai hku na, shanglawt asuya kaw na n dau shabra ai hpe law malawng gaw hkan sa ai hku rai nga ai. n kau mi kaw na mari shajan da ai ni gaw kaji kajaw gaw mayun mayoi rai di lagu dut sha ai ni mung nga nga ma ai. Ding re kaji kajaw gaw nga ai. Grai rai di tsai hkra gaw n lu rai shi ai.”

KIO kaw nna, gat seng hkan, hpyendap dap gunrai ni hpe, ta tut yeng seng jahten ai lam ni n galaw ai raitim, n dau laika shabra ai hpang kaw nna, mung shawa ni hkan sa ai re lam chye lu ai.

Ndau laika hpe Lai wa sai, February hpang jahtum bat hta shapraw ai rai nna, laika hta March 20 ya shani hpang jahtum tawn nna, Myen hpyendap gun rai Myanmar Beer, Dagon beer, A.B.C, Rum, Andaman Beer, dai zawn ni hte gaw gap gunrai bilat ga htaw shalai dut mari ai lam n galaw na matu, hkum pat wa ai re lam, hpakan ginra masha matut tsun wa ai.

“Ya ten gaw seng kaji, seng kaba gara hkan san yu tim, n nga ai, kaga tiger ni sha dut ai nga ai, dai hku hkan yu shaloi chyawm gaw seng hkan n nga ai n dut ai hkrai gaw re. gat seng hkan la na mari na masha nga di hkan mari tim pyi dai gun rai n dut ai dai hku re. law malawng gaw taw mat sai hpe mu mada ai. Dut ai ni n mu ai daram re. tang du ai ngu mai tsun ai,hpakan ginra yawng ngu na ram san yu yang gaw dut ai lam n nga ai daram re.”

Raitim mung, Hpakan shara nkau hta dut mari ai lam ding yang matut nga taw ai majaw, KIO hku nna tatut rim ahkyak la shangun mayu ai lam, hpakan ginra masha nkau KNG shiga dap de shiga shana wa ai lam ni mung nga ai re.

Myen hpyendap mung shawa asuya ahkang aya zing ai hpang, mungdan ting gumlang ai lam galaw nga ai hta, Myenhpyen dap shapraw ai gunrai ni hpe ninghkap jahten sharun ai lam ni, ndut mari sha ai ladat ni hpe mung shawa lapran ninghkap n gun madun nga ai ten mung rai nga ai.

Dai hte maren, KIO woi awn let, ndai zawn gun rai pat hkum ai lam galaw nga ai hta, Lai wa sai, January shata hta Myitkyina ginwang hte Namti hkan Myen hpyen dap Gunrai Beer ni hpe Wunpawng mungdan shanglawt hpung KIO kawn, Hkan jahten sharun ai lam ni galaw wa sai re.

Dapba 2 na pru wa ai ramma marai 29, Danai Myen hpyendap DKS e rim hkrum

Hugawng Pa, Wunpawng Mungdan Shanglawt Hpyendap KIA Dapba 2 ginra na pru wa ai ramma marai 29, Danai Myen hpyendap e rim da hkrum ai lam chye lu ai.

May shata 15 ya shani, Dapba 2 ginra kaw nna pru wa ai Warazup ramma marai (2) hte Nawngmi mare na ramma marai 27 hpe Danai Da-Ka-Sa e rim da ai lam mare salang ni kaw na chye lu ai re.

Dai ramma marai 29 gaw KIO Dapba 2 ginra na yu wa ai re majaw, hpyen hpaji sharin ngut ai lam nga nga kata lam nchye lu shi ai re.

Ya ten hta Wunpawng Mungdan Shanglawt Hpyendap KIA dap ba law law na ramma ni hku nna hpyen hpaji sharin hkam la nga ai lam shiga ni mung pru nga ai re.

KIO Je Yang Dabang hpyen yen salang langai, du gyit si

Jinghpaw-Miwa ga jarit, Wunpawng Mungdan Shanglawt Hpung, KIO uphkang ginra, Je Yang hpyen yen dabang na Slg. Hpaula Gam Awng, asak (50), gaw madu hkum sumri hte du gyit si ai lam galaw wa sai re.

Nam San, Hka La mare kaw nna Je Yang IDP camp Sut Mu Awng Lawk (9) kaw shanu nga ai, Slg. Hpaula Gam Awng snr Chit La gaw August praw 1, jahpawt manap daw, hkying 2 am jan ten, hkum n pyaw wa ai kaw nna dabang nta kaw sat si ai lam re nga, dabang shiga lawk hku chye lu ai.

Miwa ga jarit hte yep Je Yang dabang gaw Laiza a dingda maga nga ai hpyen yen dabang kaba langai re. Slg. Gam Awng gaw magam gun re lam n chye lu tim, KIO ginra hpyen yen dabang na kawa la ni yawng ngu na gaw MHH hpyenla re lam chye lu ai.

COVID-19 mungkan kap bra ana zinli makawp ninghkap nga ai ladaw, KIO uphkang ginra kata shata lahkawng laman sa wa si ai manghkang masum byin ai hta, masha yawng  si hkrum ai re.

July praw 2 hta, Nba Pa ginwang daw, Mai Bat Ninghtawn, Gai Daw mare hta mare uphkang rung chyare Slg. Yaku Langzing Tang Gun hte rau dinghku masha 5 hpe aten mi hta kahtam sat kau da ai lam byin ai re.

Bai, June 18, manap 4am jan ten hta gaw Laiza, Woi Chyai mare Lawk 2 hta, KIO Mungshawa Hpyen Hpung (MHH) magam gun, Marip Singnan Awng Tu, asak 28, gap si ai lam byin ai rai nga ai.

Myen-KIA gasat gala lam, Jinghpaw Mungdaw de byin wa

Bilateral gap hkat jahkring jahkrup nga dingyang ladaw, Myen hpyendap hte KIA gasat gala majan lam gaw Jinghpaw Mungdaw ga-ang hta June 29, bat Langai Ya shani, byin hpang wa sai.

Wunpawng Mungdan Shanglawt Hpyendap, KIA Dapba (8) npu Dapdung (5), Ga Hkyeng Bum ginra de Myen hpyen hpung lahkawng htu shadut shang wa ai majaw, La Mai Yang kaw aten minit 30 daram hkrum katut gap hkat lam byin wa sai nga, KIO shiga lawk tsun ai.

“Myen ni gaw dai kaw htu shadut shang wa ai majaw aten kadun gasat poi byin ai.  Laja lana gaw n re. Tinang KIA dap ni bawm 2 lang, 3 lang kapaw rai, gap mung loi gap rai nna yen kau da ai,” nga nna KIA hpyendu langai tsun ai.

KIO The Kachin Net June 29 shiga hta, “gasat gala byin ai gaw KIA Masat (5) Dap Dung ginra kata de htu shadut nga ai Hk.M.Y (389) hpyen hpung ni hpe hpyen garum sa wa ai Hk.L.Y (237) hpyen hpung hpe KIA hpyen hpung ni hkap shingla gasat ai majaw byin ai re” nga tang madun ai.

June 22 hta mung, Loije makau Myen-Miwa ga jarit lam langai kaw hkap sin ai KIO COVID-19 ana zinli jep chyam shagyit hpe Loije Myen hpyendap ni wa hpya jahten kau ai majaw, dai shani KIA Dung (1) hte ganoi gap hkat na zawn hpyen masa shaja hkat wa sai re.

Ndai shata praw kaw nna, Lahta Sammung KIA dap ni gaw Myen hpyen ni a hkan tam majan baw gasat hkrum hpang wa ai re. Myen Tat-ma (88) hte (99) pawng hpawm hpyen hpung ni hte KIA dap ni gaw, Muse ginwang Htan Hpa Bum kaw June 6-7 hte, Kutkai ginwang Kaleng ginra hta gaw June 16 kaw nna 21 ya du hkra, gasat gala majan ni byin wa sai re.

Mungdan kata COVID-19 ana zinli makawp ninghkap lamang galaw nga ten, tatmadaw gaw jahten sharun hpung ngu masat tawn ai, Rahkai AA hte byin nga ai majan hta lai, ngam ai rawt malan hpung ginra ma hkra kaw, May (10) kaw nna August (31) du hkra majan jahkring tawn ai lam, May (9) hta ndau dat sai rai nga ai.

Raitimung, tatmadaw gaw Lahta Sammung kaw ‘ginra jasan’ galaw ai shaloi KIA hte ‘hkrum katut gasat poi’ byin ai lam tsun ndau ai gaw n jaw ai hte, kaja wa gaw masing nga nga hte galaw ai ‘htu gasat majan’ she re nga nna, Laiza KIO Shiga Magam Dap lithkam, Du Kaba Nhpang Naw Bu, dinglun ai re.

Laiza MHH hpyen ma langai, gap si

KIO mare daju Laiza kaw magam gun ai, Mungshawa Hpyen Hpung hpyen ma langai, sinat gap si ai lam, June 18, bat Mali Ya jahpawt byin wa sai.

MHH hkum dek masat B-59041 hpyen ma Marip Singnan Awng Tu, asak 28 ning gaw, Woi Chyai Lawk 2 kaw jahpawt hkying 4:30am ten, ‘tsa lu nang nna’ shi hkrai shi gap si ai re nga, seng ang ai ni tang madun ai hpe mu lu ai.

Raitim, baw kaw sinat pala gap hkra ai ningma hpe yu yang shi hkrai gap si masa n pru ai re.

“Ya yu yang shi hkrai gap si ai masa n re lu. Hpang hku na gap dat ai masa re lu,” nga nna shimlam a majaw mying n tsun mayu ai KIA magam gun langai, Jinghpaw Shiga Dap, KNG de tsun ai.

Ndai mabyin hte seng nna KIO hte, shi hte hkridun ai shiga dap ni hta mabyin shiga tang madun ai lam n nga shi ai re.

2011 ning Shanglawt Majan kalang bai byin wa na mahka, Wunpawng Mungdan Shanglawt Hpung, KIO Uphkang Dap npu MHH hpe madung shanglawt hpyenla dingsa ni hte mungshawa ni shanglawm hpaw ninghtan ai re.  MHH dap ni gaw lamu ga ginra masa dang ai majaw Myen hpyen wa hpe ‘KIA a hkap hkan ladat’ hte shingdaw ai majan hta grai mying dan dawng lai wa masai re.

Jahten Sharun Hpung ginra ni hta lai Majan Jahkring ai lam Myen hpyendap ndau

Jahten Sharun Hpung ngu masat tawn ai wuhpung ginra ni hta lai, ngam ai shara yawng hta May 10 kaw nna August 31 du hkra majan jahkring tawn ai lam, Myen hpyendap May praw 9 hta ndau dat sai.

COVID-19 ana zinli makawp ninghkap hte tsi lajang lam hpe atsawm grak laga galaw lu na matu hte htani htana simsa lam gawgap lu na yaw shada let ya na zawn majan jahkring ai re nga, tatmadaw Dap Up Daju rung ndau hta tsun ai.

Ya ten terrorist (ningchyun shanang jahten sharun hpung) ngu masat hkrum ai gaw Rahkai Arakan Army (AA) hte Arakan Rohingya Salvation Army (ARSA) yan rai nhtawm, ndai ten hpyen majan mung Rahkai mungdaw hte Palewa, Hkang mungdaw e grai na du nga ai re.

Jinghpaw mungdaw kata AA hpe hkapla tawn ai KIO ginra ni hta ndai majan jahkring ai ndau hkan shatup na masa n nga ai re. Lai wa sai March 20 hta, AA nga ai KIO Laiza hte Mai Ja Yang mare lahkawng gasat hkrum wa na re lam, Myen hpyendap kawn KIO hpe sadi jaw ai lam nga sai.

Ndai zawn shata 3 jan majan jahkring da ai ladaw, amyusha laknak hpai hpung ni hku nna tatmadaw Dap Up Daju a simsa lam lamyan (6) hta na (4) hpe hkan sa ra na re lam shadut tawn ai.

Dai lamyan mali gaw, myit hkrum da sai ga sadi ni hte maren sadi dung na matu, simsa lam ga sadi ni ntsa amyat n htuk na matu, buga ginra mungchying mungshawa ni hpe jamjau n jaw na matu, mungdan kawn shagrin da chyalu upadi ni hpe hkapla hkan sa na matu, tsun tawn ai.

Dai hta n ga, laknak hpai hpung shada da gasat gala n galaw na hte ginra masha ni ntsa adip arip n galaw na lam, asuya uphkang dap, matut mahkai hkawm sa hkawm wa lam hte mungshawa akyu ara hpe makawp maga lit la na matu, tsun shadut tawn ai re.

Lama na ndai lam ni hpe hkan sa ai lam n nga yang, tatmadaw gaw man ang ai hku ahkyak la na re lam tsun timung, gara ladat hte ari jaw na lam gaw n sanglang tawn ai.

COVID-19: KIO Dingdung Ginwang de masha pru-shang pat hkum

KIO Dingdung Ginwang kata dapshawa mungshawa pru-shang lam yawng hpe ndai May shata praw 1 kaw nna 31 du hkra pat hkum kau sai lam, ndau dat sai re.

April 30 Dingdung Ginwang Covid-19 Ana Makawp Maga Komiti a ndau laika hta e “Mawdaw, jakli ni hte htaw wa htaw sa galaw ai masha hte arung arai ni yawng Covid-19 Komiti kawn masat da ai ana sat ladat ni jawng hkamla ai hpang sha pru shang hkawm sa ai lam galaw na” nga ai.

Myitkyina kaw coronavirus (covid-19) machyi masha langai du wa ai majaw, tinang uphkang ginra Mali-N’mai Walawng hte Mali-Hkrang Walawng de ana zinli n kap bra wa hkra, ya na zawn masha pru-shang lam pat hkum ai lam (lockdown) galaw ra wa ai re nga nna, ginwang hkamja du langai Jinghpaw Shiga Dap (KNG) de tsun ai re.

Dingdung Ginwang kata masha pru-shang chyinghka shagyit 7 hta Covid-19 ana maram masam hte makawp ninghkap lamang ni galaw na re lam chye lu ai.

Jinghpaw mungdaw hte Lahta Sammung (Kachin Sub-state) KIO uphkang ginra yawng kaw covid-19 ana zinli makawp ninghkap lamang hpe grak laga galaw na matu March shata htum wa de KIO Ginjaw matsun da ai lam chye lu ai.

Myen mung e covid-19 machyi masha yawng 151 nga ai kaw si ai marai 6 rai nna bai mai ai 37 re lam, Myen asuya Hkamja Dap hte Ginsup Hkringmang Dap a May praw 1, shana hkying 7pm ndau hta mu lu ai.