Amyu sha lawt lu na matu, rawt malan ai amyu sha ni hta ru yak jamjau lam ni matut hkrum hkra wa na re lam Ningbaw Kaba Dukaba Nban La shaning ninghpaw mungga hta tsun da ai hpe mu lu ai re.
2023 ning laman rawt malan hpung ni awng padang dip lu ai madang gaw laklai dawn jan nga ai masa rai nna, Mungdan ting madang Myen hpyen dap hpe htim gasat dat ai rai yang, Myen hpyen dap maga hkam jan lu na atsam n nga sai hte majan sum taw nga sai hpe mu lu ai lam tsun tawn ai re.
Ginchyum dat awng padang dip lu hkra rawt malan hpung ni shada myit tau hkat let hpyen madung hpe ninggun dat gasat sa wa taw nga ai re.
KIO Tinyang Up Dukaba Nban La a shaning ninghpaw mungga lam a ntsa mung masa yu maram nga ai salang langai shi a ningmu hpe ndai zawn tsun ai re.
“Shanhte KIA KIO ni hku na galaw ging galaw ang ai magam bungli ni hpe laga rawt malan hpunau ni, NUG hte matut galaw na, mung shawa ni mung shan hte a ntsa matut kam ya rit, awngdang ai lam lu la hkra shakut sa wa na ga ai, ngu ai ram hpe sha n gun jaw da ai ngu mu mada lu ai,” nga tsun maram da ai re.
Matut na rai tim, amyu sha ni a kata hta kaning re ai yak hkak jamjau hkrit tsang myit pu ba ai lam ni byin hkrum hkra wa tim, shada pu gang masin machyi rai nga na lam, ningbaw kaba matut tsun n gun jaw da ai hpe mu lu ai re.
