Indaw kaw na htu lung wa ai Myen Hpyen ni dai hpawt manap Mawlu hpe gasat zing kau sai lam shawng lam hpyen magam gun ni kaw na chye lu ai re.
Indaw Muklum hpe htim gasat zing ngut ai hpang Ndai May shata praw 2 kaw na, Mawlu de bai htim gasat wa ai rai nga ai.
Indaw kaw na Mawlu de htim gasat wa ai ten, PDF pawng hpawm ni lam lapran kaw n htoi 4 ya tup hkap shingla gasat ai hta, Myen hpyen maga si hkala law ai rai tim, Hpyen laknak n-gun n bung ai majaw, ginra n kau hpe bai tat sum kau ra mat ai masa re lam, shawng lam hpyen magam gun langai n dai zawn tsun dan ai re.
“Myen hpyen ni Indaw de shang ai kaw na Mawlu de bai gasat wa na re chye ai majaw, anhte maga na lam lapran mai byin ai ram hkap shingla gasat ai, bawm ni hkam ai, rai tim myen ni gaw Drone hte kaga madang tsaw ai laknak ni grai lu lang mat ai, dai majaw anhte mag ana hkyen da ai daram masan n sa ai ngu mai tsun ai, laknak n-gun nbung ai majaw, yen kau ra mat ai ngu ai baw rai nga ai,” nga tsun ai re.
Myen Hpyen dap ni ndai laman, Indaw Maw lu ni hpe htim gasat zing madu kau wa ai hte rau, KIA PDF ni uphkang taw nga ai, Jinghpaw Mung, Myo Hla Shwegu maga de mung hpyen n gun kaba hte bai htim gasat wa na matu hkyen shajin taw ai lam, shawng lam hpyen magam gun ni matut tsun ai re.
Myo Hla Shwegu ni hpe gasat ngut ai hpang, Manmaw de bai gasat lung wa na masa re nga, hpyen masa yu maram ai Salang wa Ndai zawn, matut tsun tawn ai re.
“Manmaw lu na matu gaw grai yak na she tai wa nga ai, ya Myen ni Katha Indaw Mawlu yawng bai lu la kau ai hpang, Myo Hla, Shwegu de bai man yawng taw nga ai, dai kaw na gaw gau ngwi ngwi Manmaw de bai man yawng wa na re,” nga tsun maram tawn ai re.
Jinghpaw Mung a matu hpyen masa lam hta ahkyak ai numshang chyinghka Indaw Mawlu ni hpe bai tat sum kau wa ai rai yang, Jinghpaw mung na gasat zing da lu ai ginra ni de mung matut na hpyen n-gun kaba hte bai gasat lung wa taw ai majaw, Jinghpaw mung de majan chyinghkraw grau na naw galu wa na masa re lam, hpyen masa yu maram ai Salang wa matut tsun dan da ai re.
Ya Myen ni htim gasat zing taw nga ai shara gaw, Jinghpaw mung the Sagaing jarit, Indaw Mawlu ginra ni rai nna, Myitkyina Mandalay mawdaw lam kaba n tsa na mare Muklum ni rai nga ai.
Dai ginra ni hpe lai wa sai 2023 ning December shata kaw KIA ABSDF Jawngma Hpung, PDF pawng hpawm ni gasat zing da ai ginra ni rai nga ai.
