Lawa Mare Kaw Warazup Pyithutsit Hpung Ni Wechat Lawm ai Phone Ni Hpe Rim Jep Nga
Lido lam kaba n tsa Lawa Mare kaw dung ai Min Zay Thant woi awn ai Warazup Pyithutsit hpung ni gaw, Mung Shawa ni a Phone Laja lana hkap jep nna, Wechat rawng ai Phone madu ni hpe hkap rim da ai lam ni galaw nga ai nga, ginra masha ni tsun shana wa ai re.
Dai ni May praw 6 Shani ka-ang ten kaw na, Lido lam kaba Hpakant de lai lung ai lam numbraw kaw dap jung nga ai, Warazup Pyithutsit hpung ni gaw, hkrun lam hkawm mung shawa ni a Phone hkap jep ai kaw, Wechat App lawm ai Phone madu ni hpe laksan shaga rim woi da ai nga, ginra masha langai KNG shiga de n dai zawn tsun dan wa ai re.
“Lawa kaw Min Zay Thant hpung ni Phone kaw WeChat App lawm ai laiwa laisa mungshawa ni yawng hpe laja lana hkap jep taw nga ai Wechat lang ai Mung shawa marai 30 daram hpe rim da sai da. rim da ai ni a mying ni chyawm a tsawm n chye shi ai,” nga tsun dan ai re.
Wechat gaw, Miwa mung na shapraw da ai Application langai rai nna, Miwa mungdan kata tara shang jai lang ai Application langai re majaw, Lungseng lauban yawng ngu na ram law malawng bungli hta jai lang ai Application langai rai nga ai re.
Ndai laman hta mung Myen ni Hpakant maga de Hpyen n-gun jat ai lam ni ding yang galaw nga ai hpe chye lu ai.
Dai ni mung Kamaing kaw na Myen Hpyen n-gun 250 daram Namya de lai lung mat ai nga, ginra masha ni tsun ai re.
Ya ten Hpakant lam hpe KIA maga pat tawn ai zawn, Myen hpyen maga na mung pat tawn ai hpe chye lu ai.
KIA pat tawn ai lam hpe Myen hpyen dap hpyen shamu shamawt ai lam ni ding yang galaw nga nna, hpyen n-gun sa ai lam ni galaw taw ai hpe chye lu ai.
Hpakant lam, Myen hpyen ni dung ai shara ni gaw, Lawa Hpakant lam numshe, Kamaing, Ma U Pin, Nam Ya, Namting, Lawnghkang Bawm Yam dap shara ni kaw dung da ai lam chye lu ai re.
Hpakant lam hpe laknak hpai lahkawng maga na pat da ai majaw, Hpakant ginra kaw gunrai manu tsaw rawt ai majaw, ginra masha ni yak hkak hkrum taw nga ai re.
Hpakant Lawnghkang Mawsiza makau grup yin shara yawng hpe KIA PDF dap ni shang shara la kau lu ai majaw, Myen hpyen ni Mawsiza Hpungkyi Jawng hte, Tinggaha garum kahtau rung dum n ta ni hta rawng taw nna, Hpyen masa shaja hkat taw ai nga, ginra masha ni tsun dan wa ai re.
“Dai ni na masa lam gaw Myen Hpyen ni Tinggaha လူမှုကူညီရေး wang, Lupwa kawng grup yin the Mawsiza Hpungkyi jawng wang ni kaw rawng taw ai da, Anhte maga na ni shawng dai makau grup yin yawng shara lu la kau ai majaw, Myen Hpyen ni shamu yak mat ai majaw, dai na maga de du hkra gaw majan byin ai lam rai n nga shi ai nga,” tsun dan wa ai re.
