Wunpawng Mungdan Shanglawt Hpung KIO up madu da ai Sinbo mare kaba hta hpaji jawng ni hpaw taw nga sai lam, Sinbo ginra masha ni KNG hpe tsun dan ai re.
Dinghkrai hpaw da ai jawng ni gaw, lahta tsang jawng (1), hte lapran tsang jawng, lawu tsang jawng (6) re lam chye lu ai.
Majan majaw, shawng na hpaji sharin ya ai magam gun ni koi yen mat ai hpang, KIO hpaji dap npu na sara/num nkau hte ginra masha apnawng ai ni matut nna bai hpaw sharin nga ai lam chye lu ai.
“law malawng gaw ramma ni grau law ai le ndai ginra na tsang shi awng ai ni dakkasu lung taw ai ni , bai nna shanhte hpe wukat bai jaw na matu mung nmai byin shi ai majaw shanhte hku na online hkan na y una sharin ya taw ai rai nga ai” nga nna tsun ai.
Lahta tsang jawng hte rai yang jawng 7 nga ai rai nna, lahta tsang jawng hta lung taw nga ai jawng ma 300 jan, sharin sara 10 jan nga ai lam, chye lu ai.
Dinghkrai jawng ni hta mi sharin ai sharin hkrang hpe sha matut jai lang nga ai rai nna, KIO hpaji dap kaw na shapraw da ai sharin hkrang hpe nlu jai lang shi ai lam chye lu ai.
KIO hpaji dap gaw ra rawng ai lam ni hpe san jep mat ai rai nna garum sa wa na re lam chye lu ai.
Sinbo ginra masha ni gaw yi sun hkauna hpe bai galaw taw nga sai raitim maga mi de Myen hpyendap a nbungli hpe mung hkrit tsang ra nga ai nga, mare shalang langai gaw ya na zawn tsun ai.
“ya ndai kaw gaw laga gaw nhkit ratim mung sawa ni gaw nbungli hpe sha hkrit ra taw ai galoi ma shani shana pyen taw ai majaw”nga nna shi gaw tsun ai.
Sinbo mare hpe KIA the PDF pawnghpawng dap ni 2024 ning April 29 ya shani gasat zing madu da lu ai rai nna, uphkang hkrang ni mung kri taw nga sai lam ginra masha ni tsun ai re.
Sinbo mare kaba hta Jinghpaw, Sam hte Myen ni amyusha ni nga ai rai nna, dai hta Sam amyusha ni law htum re lam chye lu ai.
