Tag Archives: ana zinli

Shiga

Brazil Covid-19 kap bra masha sen 10 du

Leave a comment

Myen mung aten, June 20, jahpawt hkying 6am du hkra, Dingda Amerika, Brazil mungdan hta Covid-19 ana mu jep masha 1,038,568 du sai majaw, kade n na ten U.S. hpe lai nhtawm ana zinli sawng dik rai wa chye ai lam, chyoi chye ai ni tsun nga sai re.

Si ai jahpan gaw 49,090 rai nna machyi masha jahpan tsaw lung nga dingyang hte daini lani mi hta jat wa ai machyi masha ni’nan 55,209 nga ai hpe Worldometers website hta mu lu ai.

Mungkan ting Coronavirus kap bra ai lam tsaw lung nga ten, “mungkan gaw tsang ra ai byin yan madang ningnan kaw du nga sai” nga nna June 19, bat Manga Ya shani, Mungkan Hkamja Dap, WHO, sadi jaw wa sai re.

Brazil gaw mungkan hta No.2 ana kap masha law dik rai nga ten, shi a ntsa dingdung Amerika U.S. kaw machyi masha yawng 2,295,356 hte si ai yawng 121,391 hte, na du dik htum re.

Mungkan hta No.4 ana kap bra dik htum, Myen mung htingbu Gala mungdan hta, ana kap ai hte si ai jahpan tsaw nga dingyang rai nna, ya ten du hkra, ana mu jep masha 395,812 rai nna si ai gaw 12,970 du nga sai.

Hkamja hte Ginsup Hkringmang Dap a June 19, jahpawt hkying 8am ndau hte maren, Myen mung hta ana mu jep masha n’nan 23 bai jat wa ai majaw machyi masha jahpan yawng 286 du nna bai mai tsai wa ai 192 hte si ai gaw marai 6 nan nan sha re.

Shiga

COVID-19 machyi masha yan hte hkrum katut ai J.M. masha (9) hpe san san tawn

Leave a comment

Mungkan kap bra ana zinli kaba, COVID-19 machyi masha lahkawng hte san san hkrum katut ai Jinghpaw Mungdaw masha yawng (9) hpe shinggan n pru na pat hkrum yu sin tawn ai lam, chye lu ai.

Machyi masha masat (245), la, asak (30) ning, hte hkrum katut ai Myitkyina, Shatapru na masha (8) hpe dum nta n pru na hkum pat tawn nna Machyi masha masat (249), asuya tsi sara num, askak (24) ning, hte hkrum katut ai marai (1) hpe gaw Myitkyina tsirung kaba san da ai shara (quarantine center) kaw tawn da ai re.

Ndai machyi masha lahkawng, Masat (245) hta June 9, hte Masat (249) hta June 11, ya ni hta ana jep shapraw lu ai rai nna shan gaw maigan n pru ga yu ai lam, mungdan asuya Hkamja hte Ginsup Hkringmang Dap ndau ai re.

Masat (245) gaw Sammung Dingda, Si Sai mare na rai nna ya ten Tawnggyi asuya tsirung langai kaw rawng nga ai re. Shi Myitkyina lahta Tayang Zup kaw amu galaw nga ai kaw nna dum nta n wa shi yang, May (19) hta Shatapru Mawng Tai Kah Workshop amu galaw masha (5) hte de makau Let Ya lusha seng na masha (3) hte hkrum katut wa sai lam, Jinghpaw Mungdaw asuya Covid-19 makawp ninghkap komiti na Ningtau Ningbaw U Tin Lai tsun ai re.

Bai, Masat (249) hte hkrum katut ai, asak 40, Manmaw asuya lahta tsang jawng na sara num, gaw Myitkyina Dakkasu jawng de laika jep na matu June praw 3 kaw nna du taw nga ai ten, shi hpe Myitkyina tsirung kaba COVID-19 masam maram dabang de June 11 ya shani sa ap tawn ai nga, dakkasu jawng-up Dr. Aung Win tsun ai re.

Mungdan ting madang, bat Mali Ya lani mi kaw sha, Coronavirus machyi masha n’nan marai 11 (Maigan na du wa ai, Bangladesh na 1, Gala na 10) jat wa ai majaw, ana byin ai masha yawng 260 du wa sai hte, shanhte hta bai mai tsai wa ai gaw 165 rai nna si ai gaw marai (6) nan nan re lam, asuya Hkamja hte Ginsup Hkringmang Dap a June 11, shana hkying 8, ndau hta tang madun ai.

Mungkan madang hta gaw, June 11 du hkra, COVID -19 ana kap bra shadang gaw lani mi marai 100,000 jan hte tsaw jat nga dingyang rai nhtawm lani mi si ai jahpan chyawm gaw 3,000 hte 6,000 lapran hte hkrat yawm wa ai hpe, Worldometers sawk sagawn jahpan hta mu lu ai.

U.S. gaw mungkan e ana kap ai hte si jahpan law dik rai nna ya ten machyi masha wan 2 jan hte si ai gaw sen mi jan sai re. Myen mung a htingbu Gala mungdan hta, ya ten masha sen masum hkawt kaw ana kap bra nga nna si ai gaw hkying matsat jan hte, mungdan e ana kap ai shadang nambat 4 tsaw dik de gumhtawn lung nga sai re.

Shiga

COVID-19: Maigan na nhtang wa ai ni Myitkyina de matut du

Leave a comment

COVID-19 mungkan kap bra ana zinli a majaw mungdan asuya hkrunlam lajang ya ai npu maigan mungdan na nhtang wa ai Jinghpaw mungdaw masha ni Myitkyina de du shang nga dingyang re.

June praw 7 hta Htai mungdan kaw na Gawrahka amyusha ni law malawng Myitkyina de du shang wa ai re. Ya ten du hkra, Htai kaw nna Myitkyina de mawdaw hte du wa ai masha yawng 615 du sai nnga shanhte hpe hkap la na mungdaw asuya masat tawn ai Shatapru mawdaw kaba daru kaw ana zinli makawp maga lam bungli hta ap nawng dawjau nga ai, Kachin State Covid-19 Prevention Network (KsC19PN) na Shayi Seng Nu Pan tsun ai re.

Lai wa sai shata lahkawng jan kaw nna Shatapru mawdaw daru hta maigan na shang wa ai mungdan masha yawng 2,000 daram rai sai lam chye lu ai.

Mungdan Asuya Hkamja hte Ginsup Hkringmang Dap a June praw 8, Bat Langai Ya, hkying 8 sumtang hte maren, Myen mung kaw coronavirus ana kap ai masha 1 bai kahtap jep shapraw lu ai majaw ya ten ana mu jep masha yawng 244 rai nna si gaw marai 6 nan nan naw re.

Asuya tara shang jahpan hte maren, Jinghpaw mungdaw e gaw langai sha nga ai ana kap ai masha shi bai mai tsai wa ai hpang kahtap byin ai masha kaga mi n nga shi ai re.

Ya ten mungkan ting hta, Myen mung ten June 8, shana hkying 11:43 ten du hkra, Covid-19 a majaw si ai masha yawng sen 4 jan sai hte ana mu jep masha yawng wan 7 jan rai nna ana chyam bra ai shadang tsaw nga dingyang the lani mi ana jep shapraw lu ai masha gaw sen mi lahta byin nga ai re.

Sawng dik U.S. kaw ana mu jep masha wan 2 jan, si ai sen mi jan hte bai mai tsai wa ai gaw sen 7 jan re. Bai nna, Brazil, Rasha, Gala mungdan ni hta ana mu jep masha tsaw nga dingyang rai nhtawm UK hte Italy kaw mung dingyang naw ana kap bra nga ai re.

Shiga

U.S. Covid-19 hte machyi si masha 100,000 de du

Leave a comment

Daini, Myen mung aten, May 27, hkying 12:22am du hkra, U.S. kaw Covid-19 ana zinli hte machyi si ai masha jahpan 100,088 de du ai hpe Worldometer tang madun ai.

Covid-19 ana byin shangun ai Coronavirus jep shapraw lu ai masha yawng 1,713,829 hta bai mai tsai wa ai gaw yawng 468,941 re.

Mungkan hta ana kap ai hte si ai law dik htum, Amerika e na du dik New York mungdaw e si ai masha 29,310 du nna ana mu jep masha yawng 372,494 re.

Myen mung e gaw May 26 asuya Hkamja hte Ginsup Hkringmang Dap a jahpan hte maren, Covid-19 ana mu jep masha 206, si ai marai 6 nan nan rai nhtawm, bai mai tsai wa ai gaw 124 rai nga ai.

Mungkan ting hta ana kap masha yawng 5,641,244 rai nna si ai yawng 349,712 du sai re. Ya ten mungkan ting hkrum sha ai ana zinli tsinyam gaw shawng na ningdaw kata naw re majaw bai kahtap byin wa na hpe mungdan ni sadi maja nga ra na re lam hpe WHO, Mungkan Wunpawng Hkamja Dap kaw nna May 25, bat Langai Ya shani, shadum jahprang wa sai.

U.S. kata Covid-19 kap bra lam shayawm kau lu hkra, Gumsan Magam Donald Trump kaw nna, U.S. hte hkawm sa hkawm wa pat hkum da ai mungdan ni kaw Miwa, Iran, Britain, Ireland, hte Uropa Schengen ginra mungdan 26 lawm nhtawm, ya hpang jahtum pat ai gaw mungkan no.2 Brazil re.

Shiga

Mungkan Covid-19 si jahpan 300,000 jan sai

Leave a comment

Mungkan Covid-19 ana zinli hte si ai masha jahpan, ya 300,000 jan sai lam hpe Amerikan Johns Hopkins Dakkasu a sawk sagawn shiga hta tang madun ai.

May 14 (Myen mung ten May 15, manap hkying 4: 58am) du hkra lu hta gahkyin ai jahpan hte maren mungkan ting Covid-19 Coronavirus ana mu jep masha 4,426,937 (Myen mung ten May 15 manap 4:36) hta si ai 301,370 du sai lam, sawk madun ai.

Ndai jahpan gaw mungdan 188 asuya ni jaw ai report kaw mahta ai rai nhtawm, kaja wa byin ai jahpan gaw dai hta grau tsaw na masa nga ai lam sawn da ai re.

Mungdan asuya law law gaw masha n pru hkawm na lockdown tara jahkrat tawn ai hpe bai dawm magang na ten U.S. hte UK gaw ana kap bra nga ai lam hpe bunghkup lu hkra shakut nga ai re.

Myen mung e machyi masha 181 hta na si ai 6 re lam, May 14 asuya Hkamja Dap hte Ginsup Hkringmang Dap ndau ai re.

Jinghpaw mungdaw kaw langai sha nga ai machyi masha No. 144 gaw bai hkam kaja wa ai majaw Myitkyina tsirung kaw na May 11 hta pru na ahkang jaw ai re.  Dai re majaw, asuya a jahpan sumtang hte maren ya ten Jinghpaw mungdaw e Covid-19 ana kap ai masha n nga sai re.

Shiga

COVID-19: Rasha mungkan No.2 law dik de lung

Leave a comment

Rasha mungdan a COVID-19 ana zinli mu jep masha jahpan gaw May 12, bat Lahkawng Ya shani hta U.S. a npu mungkan e No.2 law dik de rawt lung wa sai re.

Myen hpyendap na Moscow kaw hpaji wunkat lung na dat dat ai jawngma ni hta marai (5) Covid-19 ana kap ai lam, ndai shata praw de Myen hpyendu ni tsun shagrin wa sai re.

Rasha Coronavirus Tsinyam Ninghkap Rung a shiga hpe lakap nna bat Lahkawng Ya shani TASS shiga hta, Rasha e COVID-19 Coronavirus ana mu jep masha yawng 232,243 du wa sai rai nna shi a npu Spain gaw 227,436 re lam, tang madun ai.

May 9, Laban shani hta sha mungkan hta machyi masha no.5 law dik rai nga ai kaw nna, hpang shani ana mu jep masha 10,899 bai law wa ai lam tsun ai. Dai hta e bai mai tsai wa ai marai 43,512 rai nna si ai gaw marai 2,116 re nga, Bat Lahkawng Ya shani na TASS shiga hta mu lu ai.

Ana kap bra dik shara gaw Moscow mare daju rai nna machyi masha 121,301 re lam, May 12 Amerikan Johns Hopkins Dakkasu a sawk sagawn shiga hta tang madun ai.

Shiga

U.S. Covid-19 si jahpan 80,000 lai

Leave a comment

U.S. Covid-19 ana zinli byin ai masha wan 1.3 jan hta si ai jahpan 80,000 jan sai lam hpe May 11, bat Langai Ya (Sinpraw May 12) shani Johns Hopkins Dakkasu a sawk sagawn jahpan hta mu lu ai.

Mungkan mungdan 187 kaw COVID-19 ngu ai coronavirus machyi masha yawng wan 4 jan ai kaw si ai 285,000 jan hta, U.S. gaw machyi ai hte si ai law dik rai nhtawm dai gaw mungkan madang ¼ (htam mali hta na htam mi) rai nga ai.

Amerika e New York mungdaw kaw COVID-19 kap bra ana law dik byin nna, machyi masha sen 3 jan hte si ai 26,000 jan ai re.

Ndai ten U.S. mungdaw ni malawng gaw masha n hpawng de na ‘lockdown’ pat da ai tara hpe bai hpaw na masing galaw nga sai hta, madung Georgia hte Dingda Carolina mungdaw yan gaw madung re.

Myen mung hta e gaw ana byin ai masha yawng 180 hta si ai marai 6 rai nna, Jinghpaw mungdaw kaw langai sha nga ai machyi masha masat 144 hpe May praw 5 hte 8 ningdaw lahkawng lang ana jep yu ai shaloi n mu ai majaw, May 11, bat Langai Ya shani tsirung na pru na ahkang jaw dat sai lam, Myitkyina tsirung kaba na Dr. Bung Maw tsun ai re.

Shiga

U.S. Covid-19 si jahpan mun sanit du sai

Leave a comment

Covid-19 ana zinli hte, bat Lahkawng Ya du hkra U.S. kaw si ai masha jahpan mun sanit jan sai re.

May praw 5 (Sinpraw nhtoi May praw 6) du hkra, Johns Hopkins dakkasu a jahpan hte maren, U.S. kaw coronavirus snr Covid-19 ana kap masha 1,203,502 hta e si ai marai 71,022 rai sai re.

Ya ten mungkan e mungdan, ginra 187 hta ndai ana chyam bra nga nna, ana kanu mu jep lu ai machyi masha yawng 3,651,010 hta e si gaw 256,736 rai nna, dai hta Amerika gaw na du dik re.

Myen mung kaw ana kap ai masha yawng 161 hta Jinghpaw mungdaw na 1 rai lawm nna, si ai yawng 6 re lam, asuya Hkamja Dap hte Ginsup Hkringmang Dap a May praw 5 ndau hta mu lu ai.

Masha kaw Covid-19 Makawp Maga Tsi Chyam Nga

Shawng n’nan Pfizer hte, shi hte gindun ai BioNTech yan shapraw ai coronavirus makawp maga tsi (vaccine) hpan mali hpe Amerika e chyam hpang nga sai lam, sawk sagawn ai ni May praw 5, bat Lahkawng Ya, shani tsun wa sai.

Nsa shaw lam hta byin ai ana zinli ninghkap lu ai, Pfizer hte Germany na BioNTech yan galaw ai vaccine ni hpe hkam ja ai masha hta htu chyam nga sai lam hpe Amerikan tsi dakkasu lahkawng, Manhattan mare New York University Grossman School of Medicine hte Baltimore mare University of Maryland School of Medicine, na sawk sagawn ai ni hpaw tsun ai re.

Pfizer hte BioNTech yan na vaccine tsi ni hpe masha kaba asak 18 kaw nna 55 ni kaw shawng chyam ai kaw nna asak grau kung ai ni kaw mung chyam yu wa na re nga, Pfizer tsun ai.

Marai 360 hta chyam da ai mahtai hpe du na shata chye wa lu na re nga, tsun ai.

Maga mi de, Moderna Inc. hte Oxford University ni galaw shapraw ai Covid-19 makawp maga tsi (vaccine) ni hpe mung masha hta htu chyam ai lam ni galaw nga ai re.

Pfizer gaw kade n na ten Covid-19 vaccine ni hpe shi a tsi jakrung U.S. Massachusetts, Michigan hte Missouri mungdaw ni hta sha n ga Belgium mungdan Purrurs hte laga shara ni hkan e mung galaw shapraw wa na ginshan jahkrat tawn ai re.