U.S. Covid-19 si jahpan 45,000 jan sai
![](https://kachin.kachinnews.com/wp-content/uploads/2020/04/KNG-mungkan-covid19-ana-zinli.png)
U.S. Covid-19 ana zinli hte si ai masha, April 21, bat Lahkawng Ya (Amerika nhtoi) du hkra, marai 45,000 jan rai sai hte ana mu jep ai machyi masha 800,000 jan sai lam, Reuters shiga dap a jahpan hta mu lu ai.
Amerikan gaw mungkan hta coronavirus ana kanu (Covid-19) mu jep masha law dik rai nna, dai gaw nambat lahkawng law dik Spain hta hti hkum htam 4 hkawt law ai rai nga ai. Mungkan ting Covid-19 jep shapraw lu ai masha jahpan wan 2.5 jan nga ai kaw 1/3 (sumpum masum hta na sumpum mi) gaw Dingdung Amerika Dan hta byin nga ai lam re.
Bat Lahkawng Ya shani si masha 2,600 jan bai jat wa ai re.
Myen mung e, April 21, shana hkyin 8pm kaw shapraw ai Asuya Hkam Ja Dap hte Ginsup Hkringmang Dap a ndau hta, Covid-19 ana hte si ai marai 5 hte hpawn ana mu jep ai masha yawng 121 du wa nna dai kaw marai 6 gaw hkam ja dap magam gun re lam, tang madun ai re.
Jinghpaw mungdaw e gaw mungdan kata-shinggan pru hkawm nna bai du shang wa ai masha 4,600 jan hpe nhtoi 14 ya maram masam Facility Quarantine galaw tawn ai kaw ana kap ai masha n nga ai lam, Mungdaw Hkam Ja Dap tsun ai re.