Manmaw Moe Tseing Kyun ( မိုးစိမ်းကျွန်း) mali hka zinlawng hpe Pawng hpawm ni Jawm Gasat Nga
Manmaw Ts.K.Hk (21) hpyen dap sinna maga Moe Tseing Kyun ( မိုးစိမ်းကျွန်း) mali hka zinlawng hpe KIA hte pawng hpawm maga laja lana htim gasat taw nga ai lam chye lu ai
Dai Malihka Zinlawng gaw Ts.K.Hk (21) dap shara a matu ahkyak ai zinlawng mare kaji langai re lam matut chye lu ai.
မိုးစိမ်းကျွန်း zinlawng hpe htim gasat ai hta KIA Dapba (5) Dapba (8) hte Pawng hpawm Hpyen hpung ni htim gasat nga ai lam shawng lam magam gun langai n dai zawn tsun ai re.
“Ndai laman gaw Manmaw muklum Sinna maga na မိုးစိမ်းကျွန်း ngu ai Malihka zinlawng hpe htim gasat taw nga ai, Myen hpyen maga na mung hpyen gasat nbungli hpan hkum lang nna wa gasat garum ya nga ai, laja lana re.” nga tsun ai.
Matut nna rai tim, Myen Hpyen maga na gaw, Hk.L.Y (47) dap jung tawn ai mare maga na Sin Kung, Kung Mahat, Lupwa kawng grup yin na KIA dap shara ni hpe htim gasat nga ai lam shawng lam magam gun langai ndai zawn matut tsun ai re.
“Manmaw gaw nut nga ding yang re, Mani gaw n dai Zone (2) maga na Hk.L.Y (47) dap nga ai Kung Mahat, Sin Kung, Lupwa kawng maga htim ai majaw, anhte maga na ni mung mai byin ai daram hkap shingla gasat nga ai, laja lana re ga rai nga ai.” nga tsun ai re.
Mani majan byin ai shara gaw, Majan hpyen man (2) shara kaw byin ai rai nna, Pawng hpawm maga marai (1) asak ap nawng mat ai zawn, Myen Hpyen maga na sinat nkau padang dip zing la lu ai lam ni nga ai hpe chye lu ai.
Manmaw majan (2) ning hkawt na wa ai ten, Manmaw Muklum tsa htam shadang 70% daram hten za mat sai rai tim, gara maga na mung padang dip zing lu ai lam n nga ai sha, majan ding yang matut byin nga ai lam mung rai nga ai.
Ya ten Manmaw shawng lam hpyen man ni de majan laja lana matut byin nga ai zawn, Mungmyit maga na htu lung wa ai Myen hpyen hpung ni hpe mung lam lapran hkap shingla gasat ai majaw, majan ding yang matut byin nga ai re.
Manmaw Shawnglam hpyen man hta n dai laman Myen Hpyen maga htim gasat ai lam nga ai zawn, KIA Pawng hpawm maga na Myen Hpyen dap hpe htim gasat ai majaw, majan laja lana gasat poi byin nga ai lam, shawng lam hpyen magam gun ni kaw na chye lu ai.
