Laiza Manmaw lam lapran Dasai Mare na Tahkaw Hka Mahkrai Hpe Nbungli Bawm Jahkrat jahten

Laiza hte Manmaw lam lapran na ahkyak ai Tahkaw hka mahkrai hpe Myen hpyen dap nbungli bawm sa jahkrat bun wa ai lam chye lu ai.

Dai ni hkying 10 ten daram hta Mandalay na lung wa ai Myen Hpyen Jet Nbungli langai Myitkyina Manmaw lam kaba n tsa na Myo Thit (Dasai) Mahkrai hpe bawm sa jahkrat bun ai majaw, Mawdaw lai n mai hkra hten mat ai lam ginra masha ni tsun ai re.

“Bawm wa hkra ai maga mi tsawm ra n yawt mat sai, mawdaw ni gaw mai lai na n tai sai, Manmaw de hpyen garum ai hpe dingbai dingna jaw mayu ai majaw re ga rai nga ai,” nga tsun ai.

Nbungli bawm a majaw hkrai noi ding sa yawng tsep kawp hten ayai mat nna, mahkrai nnan maga gaw, chyen mi maga n yawt mat ai majaw, mawdaw lai na matu yak mat ai hpe chye lu ai.

Dasai mahkrai gaw, Laiza Manmaw lam nmaw kaba Myothit hte Numlang mare lapran na Tahkaw hka mahkrai rai nga ai.

Ya ten dai ginra majan byin ai lam hpa n nga ai rai tim, Myen hpyen maga mung shawa ni hkawm sa jai lang taw ai mahkrai hpe bawm sa jahkrat bun wa ai rai nga ai.

Mahkrai bawm sa jahkrat bun ai majaw, mung shawa si hkala hkra ai lam gaw hpa n nga ai hpe chye lu ai.

Ya ten lai sa lai wa lam hpe KIO maga gan pat tawn ai lam chye lu ai.

Ya bawm jahkrat hkrum ai mahkrai gaw, Myo Thit mare makau na Ta Hkaw hka mahkrai shara kaw re lam chye lu ai.

Ya ten dai nmaw lam kaba hku Sengke ding yang matut lai nga ding yang re lam chye lu ai.