Myitkyina kaw Shat Gawk lusha manu tsaw rawt ai majaw, ginra mung shawa ni yak hkak hkrum nga ai lam ginra masha ni tsun ai re.
Mung masa a majaw galaw lu galaw sha lam hta gaw yak, gunrai manu gaw lani hte lani tsaw hkrai tsaw, bungli gaw n nga grai yak ai lam n dai zawn tsun dan ai re.
” Anhte Myitkyina ga gaw asak matut hkrung na pyi n loi wa sai, bungli gaw n nga, tam lu tam sha gaw yak, gunrai manu ga tsaw she tsaw, lani mi lani mi shatawt na matu grai myit ru ai nga,” nga tsun ai re.
Ya ten Myitkyina kaw Shakau hkyeng Joi mi 13,000 hte 15,000 lapran nga ai rai nna, Shakau hpraw joi mi 12,000 daram, Sau joi mi 12,000, Ngu buk mi 200,000, Wa Shan Nga Shan joi mi 50,000 nga ai lam chye lu ai.
Shakau hkyeng joi mi hta shawoi 5,000/6000 sha nga ai rai tim, gau ngwi ngwi tsaw rawt wa ai ya n dai laman 13,000 hte 15,000 lapran nga ai lam Myitkyina gunrai dut ai ni kaw na chye lu ai.
Dai ning 2026 ning hta Myen mung lawu ga de hka kaba jan ja re majaw, mam n tai mat ai law ai majaw, N-gu manu shani shagu tsaw rawt taw nga ai re lam, n-gu seng ni tsun ai re.
“Dai ning hkan anhte Jinghpaw mung n-gu pru ai shadang grai yawm mat sai. lawu mung de na n-gu she dut taw ai. moi ya hka bai kaba ai re nga yang gaw hta-ning hkan gaw manu grau laja wa na re. dut na pyi nga kun?” nga tsun ai re.
Myitkyina kaw ya na zawn shat gawk lusha rai ni manu hpu ai majaw, dinghku kanu num ni lani hte lani mai byin ai hku tawt lai taw nga ai lam tsun ai re.
“Shawoi simai da mi kaw, Shakau hkyeng tawng mi lang ai rai yang, ya gaw, dai tawng mi hpe, ma 2 sha ai ladat hku na woi tawt shalai taw nga ai,” nga tsun ai re.
Shakau hkyeng manu tsaw rawt ai sha n ga, kaga shakau hpraw Jum shanam Sau n-gu manu yawng rawt ai lam tsun ai re.
Jinghpaw mung kata ya na zawn gunrai manu tsaw rawt ai rai tim, mung shawa ni tam lu tam sha na matu bungli lam ni yak hkak ai lam tsun ai re.
“Galaw lu galaw sha lam hta gaw yak, bungli gaw n nga, gunrai manu gaw rawt, mai byin ai hku asak matut nga ai ga rai nga ai” nga Myitkyina ginra amyu shayi langai matut tsun ai re.
Myitkyina Mandalay lam kaba n tsa Myen Hpyen Dap hte PDF dap ni jahkring hkring majan byin, lam pat ai majaw, Myitkyina de gunrai manu tsaw rawt taw ai lam mung rai nga ai.
