Ndai laman Hpakant ginra kaw Myen hpyen shamu shamawt ai lam ni galaw nna, laknak kaba gap shadam bun ai lam ni bai galaw nga ai lam Hpakant ginra masha ni tsun ai re.
October (4) ya Laban jahpawt Kate Mawsiza maga de Myen hpyen ni shamu shamawt hkawm wa na rai nna, laknak kaba gap shadam bun ai kaw, Hpakant Lawnghkang mare lawk 4 na dum n ta langai kaw wa hkrat ai majaw, mung shawa (1) ai nna, (2) hkala hkrum wa ai lam Hpakant ginra masha langai KNG de tsun dan wa ai re.
“Mana maga Myen lungseng Company shara de yu wa ai majaw, ang katut jahkring mi gap hkat ma ai, Tatma kawng na laknak kaba gap garum ai nga yang, Lawnghkang de wa hkrat nna, mung shawa (1) si ai (2) Hkala ai,” nga tsun dan ai re.
Dai jahpawt Hpakant Tatmamu gaw, Lauban ni hpe shaga zuphpawng nna, Myitkyina – Hpakant nmaw lam kaba galaw na hte seng na woi bawngban ai lam nga ai hpe chye lu ai.
Myen hpyen dap woi bawngban ai masa lam hte seng na kata lam gara hku galaw mat na ngu ai hpe a tsawm tup hkrak gaw n chye lu shi ai re.
Ndai laman Myen hpyen Maw 6/7 dang, Hpakant Danai maga de man yawng lung wa taw nga ai lam mung shawa ni kaw na chye lu ai.
Hpakant ginra kata hpyen majan n byin ai rai tim, hkawm sa hkawm wa mung mare masha ni hpe san jep ai lam gaw, ding yang galaw nga ai hpe chye lu ai.
Myen hpyen maga na Pyithutsit hpyen n gun ding yang jat bang nga ai masa hpe yu yang, Hpakant ginra de hpyen majan matut byin wa na masa nga ai lam, ginra mung shawa ni tsun maram da ai re.
