Hpakant de marang kaba grai bai htu sawng ai majaw, dai hpawt manap kaw na, Uru hka kaba nna, mung shawa law law hka hpyen bai hkrum sha taw ai lam chye lu ai.
Mana yuptung ten kaw na marang kaba bai htu ru ai majaw Uru hka kaba tsaw jat nga ding yang re majaw, lamu ga nyem ai maga de nga ai, mung shawa yawng sadi maja let nga na matu Hpakant ginra masha langai KNG Shiga de n dai zawn tsun ai re.
“Uru hka mana kaw na grai bai kaba taw nga ai, hka rawt ai shadang mung grai lawan taw nga ai, dai ni shani ka-ang ten du hkra rai yang, Letma 5 (၅ လက်မ) du sai, shawoi dai ram n kaba ai, n dai kalang na gaw sawng ai,” nga tsun ai re.
Dai hpawt manap hkying 8 daram ten kaw na Mawwan mare de shang hka shang hpang wa ai majaw, lam kaba n kau ya ten lai nmai mat ai lam ni byin taw ai hpe chye lu ai.
Dai hpawt manap hka shang ai majaw lai hkawm n mai mat ai shara ni gaw, Mawwan Hpakant Myoma lawk, Ayemyartaryar, Mawtawng, Sanchyoi, Hpapyin mayan na lam n maw ni hka lim taw ai majaw, Mawdaw Sengke lai hkam n mai ai sha n ga, n ta nyem ai hkan na mung shawa yawng mung htawt sit taw ra ai lam chye lu ai.
Ndai kalang hka kaba ai gaw, shawoi na hta hka grau law taw ai majaw, shaoi hka kaba ai hta grau sawng na masa nga ai lam ginra masha ni tsun maram tawn ai re.
Uru hkahku Ginsi lahta de marang matut htu nna, Hka matut tsaw rawt taw ai re majaw, Uru hka lam mayan de nga ai mung shawa yawng matut sadi maja ra na lam lit nga ai salang ni tsun da ai re.
