EU Mungdan Ni Kaw Na Myen Hpyen Dap hpe Masat Masa N Galaw na matu hte Terrorist hku masat ya na matu (BHRN) ni sa du hkrum

EU Mungdan kaw nga ai Myenmung amyusha bawsang (Landon based – Burma Human Rights Network (BHRN) ni hku na EU Parliament rapdaw salang , hkringmang langai hte sa hkrum shaga wa lu ai lam, dai kaw shang lawm ai Salang langai KNG shiga de tsun dan wa ai re.

EU Parliament rapdaw salang , hkringmang Salang wa hte sa hkrum jahta ai kaw, masu hkalem ai ra lata poi na lung wa ai hpyi galai asuya hpe tara shang asuya hku na masat masa n galaw ya na matu hte Terrorist (Gumshem Zai Mazut Hpung) nna sha masat ya na lam hpe sa tsun dan wa lu ai nga tsun ai re.

Ya na zawn EU Parliament hkringmang ni hte sa hkrum jahta wa ra ai lam hte seng na dai kaw shang lawm ai Salang Layang Hkun Htoi gaw n dai zawn KNG de tsun dan ai re.

“EU de sa hkrum ra ai ngu gaw, Min Aung Hlaing wa hpyen hking hpe raw kau hpyi galai nna mung shawa tai masu nna, shan hte a daru magam ahkang aya hpe aten galu ngang grin hkra galaw sa wa taw ai hpe, n kau htingbu mungdan ni hkap la madi shadaw wa ai zawn EU Mungdan ni mung n dai kaw n kadawng bang na matu, Myen Hpyen Asuya hpe madi shadaw ai lam n galaw na matu hte Terrorist ngu ai, gumshem zai mazut ai hpung ni re ngu masat ya na matu sa lu tsun dan wa ai. shan hte hku na mung EU kaw na gaw masat masa galaw na n re lam ga sadi jaw wa ai,” nga tsun dan ai re.

Ndai sa du tsun dan ai lam hta Myen mung na n law ai amyu kaji ni London kaw du nga ai, Hkang, Musiliam, Rohingya, Kachin ni lawm nna sa du hkrum shaga wa lu ai re lam chye lu ai.
(Landon based – Burma Human Rights Network (BHRN) kaw na woi awn let n dai kalang shawng ningnan sa du hkrum shaga wa ai re lam chye lu ai.

Ndai kalang ngut ai hpang matut nna mung naw sa du hkrum na lam ni nga ai re hpe chye lu ai. hpang kalang hkrum ai hta gaw bawsang amyu grau jahkum lu hkra shakut galaw sa mat na re lam chye lu ai.

Ndai kalang hkrum jahta lu ai lam hta amyu bawsang shagu ni a manaw n sen langai hte sha Myen hpyen dap hpe matut ahkyak la ya na matu sa tsun da ai lam hta n-gun lu ai hte tsun dan lu ai nga n tsa na salang wa n dai zawn matut tsun ai re.

” Ya Myen hpyen dap hpe ahkyak la ai ICC, ICJ ngu ai gaw, Veto အာဏာ lu ai Mungdan langai kaw na sa ninghkap jang prai mat ai re majaw, ICC, ICJ kaw jeyang dawdan ai hku n re sha, EU Mungdan ni a tara hte hkrak ahkyak la ya na matu lam tam shakut ya na lam ni hpe mung hpyi shawn da ga ai.” nga tsun ai.
EU, UN ni hte shaga na matu lam hpaw tawn ai rai tim, Spring Revolution hpe hkrai ap da ai majaw, NUG Maigan hkringmang hpung ni kaw na mung grai wa tang du hkra sa tsun jahkrup lu ai lam hpe n mu lu ai nga matut tsun ai re.

NUG ni hku na shan hte a lam hpe hkrai sa tsun hkawm nna, amyu kaji ni a mayak lam ni hpe tsun bawngban ai n mu lu ai majaw, amyu kaji bawsang wuhpung ni hku na ya na zawn hkrum bawngban hkawm wa ra ai lam re nga matut tsun dan da ai re.