May praw 1 ya shani Kutkai ginwang Huhpyet mare na Jan Lahpai Ja Bang ngu ai Jan hpe ka-ni dut sha ai ngu n tsen n hten ai mara hte rim woi mat ai hpang, adup gayet zingri ningma hkang hte asak si sum hkrum mat ai lam, dum n ta masha ni KNG de tsun dan wa ai re.
May praw 1 ya shani KIA Dung 9 na Balik Awng Myat hte shi manang ni rim woi mat ai lam chye lu ai.
Dai zawn rim woi mat ai hpang, dum n ta masha ni May praw5 ya shani Dapba 6 de bai lung nna, wa san yu yang, Machyi kaba hkrum nna si mat sai lam bai tsun n htang wa ai hpe chye lu ai.
KIA maga hkap tsun dan ai lam hta, Jan Lahpai Ja Bang gaw, machyi kaba hkrum ai majaw, shi hpe tsi tsi nna, tsi noi da ya ai tsi pyii rai n ma shi yang, n sa kaba sa na si mat wa ai lam, hkap tsun ai nga, n ta masha langai KNG Shiga de n dai zawn tsun ai re.
“Anhte na Kanu Kana Jan hpe hpa sakse sakgan mung nnga ai Kani dut sha ai ngu mara the rim woi mat nna, Kani n dut sha ai hpe dut sha ai ngu n yin la hkraw ai majaw, agying adup gayet zingri ai kaw, dai adup gayet zingri ai ningma hkang hte machyi sawng na si mat ai rai nga ai,” nga tsun ai.
Jan Lahpai Ja Bang a hkumtsawp hpe bai hpyi yu yang, balit ni dup da ai hkang hte machyi kaba hkrum nna si mat ai masa re lam chye lu ai.
KIO maga ya na zawn Lahpai Nang Bang hpe asak si hkrum hkra zingri sat kau ai lam hte seng na, dum n ta masha ni gaw, Bunglat hka hku na sen 500 hpyi yang, Sen 50 sha jaw lu ai lam tsun wa ai hpe chye lu ai.
Ya ten dai dup zingri ai balik wa hpe mung, bungli shaja n htoi 45 ya dam ari jaw da ai lam nga ai majaw, dai hta grau ai dam ari jaw ya na hpe dum n ta masha ni hpyi shawn ai rai tim, KIO maga hpa mung bai n htang tsun ai lam n nga ai hpe chye lu ai.
Ndai amu manghkang lam the seng na, ya n htoi 60 ya du wa ai rai tim, KIO maga a tsawm lit la hparan ya ai lam n nga ai majaw, KIO maga na lit nga nga hte rap ra ai hku na, dawdan hparan ya na malai, dai kaw ang ai Salang kaba ni hpe shan hte a Power lang nna, mung shawa ni a na hta n shang ai hku na hkrai tsun shaga ai majaw, ginra masha ni n ra sharawng ai lam byin nga ai hpe matut chye lu ai.
Ndai lam hte seng nna, lit nga ai KIO maga de gaw, a tsawm tup hkrak rai nlu san shi ai re.
