Hpakant Lawnghkang Goft Pa hte Lupwa kawng mayan kaw dai hpawt manap jau kaw nna laja lana gap gasat hkat taw ai lam ginra masha ni tsun shana wa ai re.
Majan laja lana byin ai majaw Myen hpyen maga gap shadam bun ai laknak kaba a majaw, Lawnghkang Ah Man Gunrai Hpan Hkum seng makau kaw laknak kaba wa hkrat nna, Num kasha ma langai asak si hkrum wa ai lam ginra masha langai KNG Shiga dap de n dai zawn tsun ai re.
“Dai hpawt kaw na gaw, Goft Pa hte Lupwa kawng grup yin kaw byin taw ai rai nga ai, Dai ni shani ka-ang ram kaw na gaw, Myen ni Laknak kaba bai gap bun ai majaw, Ah Man Gunrai Hpan Hkum seng makau na Num sha langai si ai, gat seng mung yawng hten ai Seng mung pat dat hpaw dat rai galaw taw ai ga rai nga ai,” nga tsun ai re.
Myen Hpyen dap ni gaw, Lawnghkang kaw Dap shara langai jung lu na matu shakut taw nga ai shata 4 daram du wa sai raitim, KIA PDF maga drone bawm jahkring hkring sa jahkrat bun ai majaw, lawan n lu gawgap shi ai masa re lam, hpyen masa yu maram ai ni tsun ai re.
Mashi Kahtawng Kyuhpyi Bum hpe gasat zing dai ai Myen Hpyen dap gaw Lawnghkang Mawsiza grup yin de hpyen bai shamu shamawt taw nga ai majaw, dai ni ten du hkra laja lana matut gap gasat hkat taw ai re.
Lawnghkang grup yin kaw hpyen masa shaja hkat taw ai ya n htoi shata mi jan na wa taw sai re.
Lawng hkang Mawsiza makau grup yin hta, KIA PDF dap ni shara la da nna, Myen Hpyen dap maga na gaw, Tingaha Garum Ntum Hpung wang hte Mawsiza Hpungkyi jawng ni kaw rawng taw nna, Hpyen masa shaja hkat taw ai lam mung rai nga ai.
Dai hpawt gap gasat hkat wa ai gaw, Myen ni dai shara kaw na bai pru gale mayu wa ai majaw, laja lana bai gap gasat hkat wa ai rai na masa nga ai lam, ginra masha wa matut tsun dan da ai re.
