Lawnghkang Goft Pa Makau Kaw Myen Hpyen Dap Ningnan Langai Jahkrat Na Hkyen Nga
Hpakant Lawnghkang Tsi Rung hte Goft Pa makau grup yin kaw Myen Hpyen dap shara ningnan langai bai dap jung na matu hkyen taw ai majaw, n dai laman Lawnghkang Goft Pa grup yin kaw hpyen masa shaja hkat taw ai lam chye lu ai.
Ndai laman Pyithutsit ni mung shawa hking hking nna, Hpakant de grai shang wa ai majaw, Hpakant lam hpe pat kau ai hpang, Lawnghkang Mare makau grup yin kaw hpyen masa grau na shaja hkat taw ai lam, ginra masha wa n dai zawn tsun dan ai re.
“Ya n dai laman Myen ni ding yang Tsit Kyaung htu taw ma ai, Myen ni gaw, Lawnghkang Goft Pa makau kaw Dap shara langai jahkrat na matu hkyen taw ai, dai majaw lai sa lai wa ni hpe mung grai jep ai, Shanglawt maga na mung, dap n lu jahkrat hkra ding yang na ding bai dingna jaw Drone bawm sa jahkrat ai lam ni galaw taw ai ga rai nga ai.” Nga tsun ai re.
Hpyen masa shaja hkat taw ai majaw, dai hpawt manap mung Laknak kaba gap bun hkat ai lam ni byin wa ai hpe chye lu ai.
KIA tat sum kau da ai, Mashi Kahtawng Kyuhpyi bum Myen hpyen dap shara hpe KIA PDF dap maga na shani shagu Drone bawm sa jahkrat ya ai lam ni byin taw ai hpe chye lu ai.
Hpakant kaw n dai laman Man Pa gap gasat hkat ai lam n nga ai rai tim, Lawnghkang Goft Pa hte Mashi Kahtawng Kyuhpyi Bum mayan laknak kaba ding yang ngoi taw ai lam ginra masha ni tsun ai re.
