Shwegu kaw na Mandalay de yu wa ai lam numbraw na Myen hpyen dap shara hpe gasat zing madu kau ngut ai hpang, Hpyen masa matut shaja hkat nga ai lam chye lu ai.
Shwegu lam numbraw Myen hpyen dap hpe htim gasat ai hta, Myen hpyen maga na marai 6 si nna, marai 16 hkala hkrum wa nna, sinat laknak machyu pala n kau mung zing la lu ai nga shawng lam hpyen magam gun ni tsun ai re.
Ya ten dai ginra grup yin de hpyen masa shaja hkat taw nga nna, Myen hpyen maga na mung, Hpyen n-gun jat nga ding yang re lam dai ginra na shawng lam hpyen magam gun the ni nawn ai Salang langai KNG Shiga de n dai zawn tsun dan ai re.
“Ya gap hkat taw ai ၅ လမ်းဆုံ ngu ai shara gaw, Mi kaw na tim, PDF ni nga ai shara hpe Myen ni hpyen n-gun htu na matu dingbai dingna byin nga ai majaw, Shwegu 56 Dap na ni pru wa na sa gasat ai rai nga ai, Ya mung Myen ni gaw dai shara hpe gasat zing na hpyen n-gun jat na matu hkyen shajin taw ai masa re ga rai nga ai,” nga tsun ai re.
Katha kaw du nga ai Myen Hpyen ni gaw, Nga Oo, Sihkam, Manje maga de bai htim gasat wa na masa nga ai lam hpyen masa yu maram ai ni tsun da ai re.
Matut nna Nga Oo na htu lung wa ai Myen hpyen ni gaw, Katha In Ywar mare kaw du shang nga sai rai nna, laknak kaba gap bun ai lam ni mung galaw nga ai hpe chye lu ai.
Katha Muklum shara n kau hpe lai wa sai shata hta PDF dap ni gasat zing madu da lu wa ai rai tim, n dai laman Myen hpyen n gun kaba hte bai htim gasat wa ai majaw, PDF dap maga na Katha shawng lam hpyen man na hting nut mat ai hpang, Katha hpe Myen ni yawng bai gasat zing da lu sai re.
Mandalay na lung wa ai Myen Hpyen hpung ni yawng gaw ya ten, Katha kaw hpyen n-gun wa mahkawng nga nna, KIA gasat zing da ai ginra ni de htu na matu hpyen shamu shamawt taw ai lam chye lu ai.
Ndai lanam rai n shang ai laman Mali hka lam mayan, Katha, Moe Thar, Shwegu, Si Hkam, mayan ni de majan kaba byin wa mai ai nga, Hpyen masa yu maram ai ni tsun da ai re.
