Jinghpaw Mung hte Sagaing jarit, Indaw Ginwang na Deng 10 kawng dap shara hpe Myen hpyen ni bai gasat zing madu wa ai majaw, Indaw na mung shawa ni bai hprawng yen taw nga ra sai lam chye lu ai.
Myen Hpyen ni Mani kaw na Indaw maga de hpyen htu lung wa nna, Indaw rai n du yang na Deng 10 PDF dap shara hpe gasat zing la kau sai majaw, dai ginra na mung shawa ni kalang bai hprawng yen taw sai lam ginra masha langai KNG shiga de tsun dan ai re.
“Myen ni n dai laman Katha na Tsit Kyaung lung wa ai gaw na taw ai le, ya gaw anhte Indaw de du wa sai ga rai nga ai, Ya Myen hpyen ni kalang bai shang wa jang gaw, anhte mung shawa ni kalang bai yen ra sai ga rai nga ai,” nga tsun dan ai re.
Ndai laman PDF pawng hpawm ni gasat zing da ai, Indaw dingdung maga the Indaw Sinpraw mag ana, Mawlu, Naba mare hkan na mung shawa n kau gaw, lai wa sai bat na hprawng yen ai lam ni galaw taw sai hpe chye lu ai re.
Dai ginra na mung shawa ni gaw, lai wa sai shaning kaw, PDF Pawng hpawm ni Myen hpyen dap hpe jawm gasat ai ten mung, kalang hprawng yen jam jau lai wa sai hpyen yen mung shawa ni rai nna, Ya kalang Myen ni bai htim gasat wa ai majaw, kalang bai hprawng yen ra ai mung shawa ni rai nga ai re.
Ya ten dai ginra hta, Jaksau mayak a majaw, mawdaw mayak lam ni byin hkrum nga ai hpe chye lu ai re.
Myen hpyen Shiga lawk ni hta gaw, Indaw Muklum hpe April 20 ya shani kaw na, 25 ya laman htim gasat mat na re lam ka tawn ai re.
Dai zawn ka da ngut ai hpang, April 23 ya shani kaw na Katha Indaw Naba lam maga de htu shadut htim gasat wa ai lam chye lu ai.
