Mungna hte Washawng Lapran Langu Sun na Pyithutsit dap shara lahkawng hpe KIA Htim Gasat Zing
Waimaw Mungna hte Washawng lapran langu sun kata kaw dap jung shara jahkrat nna, Langu sun madu ni kaw na gumhpraw hta sha taw ai Pyithutsit Dap Shara lahkawng hpe KIA Pawng hpawm dap ni bai gasat zing la lu wa ai nga, shawng lam hpyen magam gun hte ni nawn ai ni tsun ai re.
Dai hpawt manap Hkying 5 daram kaw na, Pyithutsit ni dap jung shara la da ai, Mungna hte Washawng lapran langu sun kata na Pyithutsit dap shara hpe KIA pawng hpawm dap ni sa htim gap gasat ai kaw na Majan laja lana gasat wa ai gaw, jahpawt maga daw hta dai langu sun na Pyithutsit dap shara lahkawng hpe padang dip zing la lu wa ai nga, shawng lam magam gun the ni nawn ai Salang langai KNG de n dai zawn tsun dan wa ai re.
“Dap Shara ngu hta gaw, Mungna hte Washawng lapran na Langu Sun kata na Pyithutsit gate shara hte Tinggi Hka Mahkrai lai kaw na Pyithutsit dap shara lahkawng hpe sa gap hpya kau ai ga rai nga ai,” nga tsun ai re.
Ndai lam hte seng na Langu sun kaw bungli galaw nga ai mung Shawa langai hpe san yu yang mung,
“Langu Sun Solar Pya Site na Lisu gate hpe sa gap hpya kau ma ai, lu zing n lu zing gaw anhte mung yen taw ai majaw, n gwi sa yu shi ai,” nga tsun ai re.
Dai hpawt manap jau myi hprim hpram mu wa ai the rau Myen Hpyen dap ni Myikyina kaw na Waimaw hkran maga de, laknak kaba laja lana gap bun wa ai hpang shani ting mung matut naw gap bun taw nga ai lam chye lu ai.
Ya majan byin taw nga ai shara gaw, Wai Maw Washawng the Mungna koi lam n tsa na, langu sun shara grup yin ni hta byin taw ai re lam chye lu ai.
“Dai Hpawt myi mu n mu shi jau kaw na sinat kaji kaba rung she nga bai ngoi taw sai, Waimaw de bai gap hkat sam ma ai, she n mai yup hkra bai ngoi gadu taw nga ai, dai ni gaw, nbungli pyen ai gaw n mu ai, shawoi hkan Waimaw de gap hkat wa yang nbungli pyen pyen re, dai ni gaw hpa pyen ai mung rai n mu shi ai nga,” Tsun dan wa ai re.
Matut nna, Dai hpawt hkying 6 kaw na, Putao Ginwang Dap Ba-1, Dung7 ginra Nhkaw Hka Mayan kaw mung majan byin taw ai lam ginra masha ni tsun shana wa ai re.
Machyang Baw kaw dung ai Myen Hpyen dap ni gaw n dai laman, Mali Hka nam maga de hpyen shamu shamawt ai lam ni galaw nga ai sha n ga, Hpyen n-gun laknak machyu pala ni ding yang sa taw ai hpe mu mada lu nga ai lam dai ginra kaw ja htu sha nga ai mung shawa ni tsun ai re.
N dai laman Putao Myen Hpyen dap kaw na Helicopter tawn da nna, Hkawng Lan Phu Shing Hkawng ginra ni de hpyen n gun sa ai lam ni ding yang galaw nga ai re.
